ក្រុមហ៊ុនមួយនៅប៉ៃលិន «បង្ហូរសំណល់រាវបំពុលប្រភពទឹកសាធារណៈ» រងការពិន័យពីក្រសួងបរិស្ថាន ជាលើកទី២

ភ្នំពេញ៖ ក្រុមការងារ «ប្រសិទ្ធភាពសុក្រឹត្យកម្មបរិស្ថានកិច្ចលើភាពស្អាត» នៃក្រសួងបរិស្ថាន កាលពីថ្ងៃទី១៨-១៩ ខែមីនា ឆ្នាំ២០២៥ បានសហការជាមួយរដ្ឋបាលខេត្តប៉ៃលិន មន្ទីរបរិស្ថាន មន្ទីរធនធានទឹកនិងឧតុនិយម មន្ទីរកសិកម្ម រុក្ខាប្រមាញ់និងនេសាទ អាជ្ញាធរស្រុកសាលាក្រៅ និងមន្ត្រីមូលដ្ឋានពាក់ព័ន្ធ ក្នុងការចុះត្រួតពិនិត្យករណីបង្ហូរសំណល់រាវចូលប្រភពទឹកសាធារណៈបង្កការបំពុល បង្កឡើងដោយក្រុមហ៊ុន Cangxinlong Food (Cambodia) Co., Ltd. ដែលមានទីតាំងនៅខេត្តប៉ៃលិន និងចាត់វិធានច្បាប់ចំពោះក្រុមហ៊ុននេះ។ ក្រុមហ៊ុននេះធ្លាប់បានបង្កការបំពុលរួចមកហើយកាលពីឆ្នាំ២០២៤ ដោយពេលនោះក្រសួងបរិស្ថានបានចាត់វិធានការច្បាប់ រួមទាំងការពិន័យអន្តរការចំនួន ៣០លានរៀលផងដែរ ។

ក្រុមការងារបានពិនិត្យឃើញថា «អូររអិល» ត្រូវបានទទួលរងការបំពុលទាំងស្រុង ពីចំណុចក្បាលឡាន រហូតដល់ស្ទឹងកុយ ដោយការពិនិត្យជាក់ស្តែងឃើញថា ទឹកមានការប្រែប្រួលលក្ខណៈរូប មានក្លិនស្អុយ និងកម្រិតរលាយអុកស៊ីសែនក្នុងទឹក (Dissolved Oxygen ឬ DO) ថយចុះខ្លាំង (តូចជាង 3mg/L) មិនអនុលោមកម្រិតកំណត់ស្តង់ដារ (ធំជាង 4mg/L)។ ករណីបំពុលនេះបានបង្កផលប៉ះពាល់ធ្ងន់ធ្ងរដល់ធនធានធម្មជាតិ ជីវៈចម្រុះក្នុងទឹក និងការប្រើប្រាស់ទឹករបស់ប្រជាពលរដ្ឋមូលដ្ឋាន ដោយផ្ទាល់និងដោយប្រយោល។ លោក ហែម ឬទ្ធី អភិបាលរងខេត្តប៉ៃលិន បានបញ្ជាក់ថាការបំពុលនេះបានបង្កផលប៉ះពាល់ដល់ទីតាំងអភិរក្សពូជត្រីរបស់មន្ទីរកសិកម្ម រុក្ខាប្រមាញ់និងនេសាទផងដែរ។

ករណីនេះជាករណីបំពុលលើកទី២បង្កឡើងដោយក្រុមហ៊ុន Cangxinlong Food (Cambodia) Co., Ltd. ក្រសួងបរិស្ថានបានចាត់វិធានការបន្ទាន់លើករណីមិនរាងចាលទៅលើក្រុមហ៊ុននេះ ស្របតាមក្រមបរិស្ថាននិងធនធានធម្មជាតិ ដោយក្រុមហ៊ុននេះត្រូវបញ្ឈប់ការបង្ហូរសំណល់រាវចេញពីទីតាំងក្រុមហ៊ុន ចូលទៅប្រភពទឹកសាធារណៈ (អូររអិល និងស្ទឹងកុយ) ជាបណ្តោះអាសន្ន រហូតទទួលបានការអនុញ្ញាតពីក្រសួងបរិស្ថាន។ ទី២ ក្រុមហ៊ុននឹងត្រូវបានពិន័យអន្តរការណ៍ករណីមិនរាងចាល លើករណីចំនួន៤ គឺ (១) ការបញ្ចេញសំណល់រាវពុំបានធ្វើការសម្អាតត្រឹមត្រូវ និងលើសកម្រិតកំណត់ស្តង់ដារបញ្ចេញ (២) បង្កឱ្យមានការបំពុលទឹកអូររអិល និងស្ទឹងកុយ (៣) បញ្ចេញសំណល់រាវ សំណល់រឹង សារធាតុបំពុលខ្យល់ ពុំមានលិខិតអនុញ្ញាតពីក្រសួងបរិស្ថាន (៤) ដំណើរការអាជីវកម្ម ដោយពុំបានរៀបចំរបាយការណ៍វាយតម្លៃ ហេតុប៉ះពាល់បរិស្ថាន និងកិច្ចសន្យាការពារបរិស្ថាន ។

បន្ថែមពីនេះ ក្រុមហ៊ុនត្រូវស្ដារសម្អាតប្រព័ន្ធអូររអិល និងស្ទឹងកុយ ដែលទទួលរងការបំពុលឱ្យ​មាន​ភាពល្អប្រសើរ ឡើងវិញ និងផ្តល់សំណងការខូចខាតលើផលប៉ះពាល់បរិស្ថាន និងសុខភាពសាធារណៈ ទៅតាមការគណនាជាក់ស្តែងរបស់មន្ត្រីជំនាញ ។ ក្នុងករណីក្រុមហ៊ុនមិនអនុវត្តតាមការសម្រេចខាងលើ ​ក្រសួងបរិស្ថាននឹងចាត់វិធានការច្បាប់​ ​​ជាធរមាន៕