«សន្និបាតប្លុកឆេនកម្ពុជា» នឹងរៀបចំនៅថ្ងៃទី ៣០ មីនា ជាព្រឹត្តិការណ៍សំខាន់ សម្រាប់អ្នកចាប់អារម្មណ៍វិស័យប្លុកឆេន

ភ្នំពេញ៖ សន្និបាតប្លុកឆេនកម្ពុជា ២០២៥ គឺជាព្រឹត្តិការណ៍សំខាន់ សម្រាប់អ្នកចាប់អារម្មណ៍នៅក្នុងវិស័យប្លុកឆេន ឧស្សាហកម្ម និងអ្នកច្នៃប្រឌិតក្នុងប្រទេសកម្ពុជា។ ព្រឹត្តិការណ៍នេះនឹងប្រព្រឹត្តទៅនៅ ថ្ងៃអាទិត្យ ៣០ មីនា ២០២៥ នៅសាកលវិទ្យាល័យជាតិគ្រប់គ្រង (NUM) ក្រោមមូលបទ “រុករកអនាគតរបស់ប្លុកឆេន”។

សន្និបាតប្លុកឆេនកម្ពុជា គឺជាព្រឹត្តិការណ៍ធំបំផុតក្នុងប្រទេសដែលផ្តោតលើការចែករំលែកចំណេះដឹង និងការអភិវឌ្ឍប្លុកឆេន។ វាជាវេទិកាសម្រាប់អ្នកដឹកនាំឧស្សាហកម្ម អ្នកច្នៃប្រឌិត និងអ្នករៀបចំបទប្បញ្ញត្តិ ដើម្បីជំរុញការទទួលយកប្លុកឆេន និងការច្នៃប្រឌិតឌីជីថលនៅកម្ពុជា។ លោក ជា សុខហ៊ី ដែលជាប្រធានគណៈកម្មាធិការរៀបចំ បានលើកឡើងថា "ប្លុកឆេនកំពុងផ្លាស់ប្តូរឧស្សាហកម្មជុំវិញពិភពលោក ហើយកម្ពុជាកំពុងក្លាយជាកីឡាករល្អក្នុងការប្រែប្រួលនេះ។ សន្និបាតប្លុកឆេនកម្ពុជា ២០២៥ នឹងក្លាយជាវេទិកាសំខាន់សម្រាប់ការរៀនសូត្រ ការបង្កើតបណ្តាញ និងការច្នៃប្រឌិត"។

កម្មវិធីនេះនឹងមានសកម្មភាពមួយចំនួនដូចជា ការពិភាក្សាតុមូលជាមួយអ្នកជំនាញ វគ្គបណ្តុះបណ្តាលជាក់ស្តែងអំពីការអភិវឌ្ឍប្លុកឆេន កិច្ចសន្យាឆ្លាតវៃ និងការអនុវត្តក្នុងជីវិតពិត ការបង្ហាញគម្រោងសហគ្រិនថ្មី និងឱកាសតភ្ជាប់ជាមួយអ្នកវិនិយោគ អ្នកអភិវឌ្ឍន៍ និងអ្នកជំនាញក្នុងវិស័យនេះ ព្រមទាំងស្វែងយល់ពីព័ត៌មានអំពីបទប្បញ្ញត្តិ និងយុទ្ធសាស្រ្តរដ្ឋាភិបាល អំពីវិស័យឌីជីថលនៃកម្ពុជា។ ដើម្បីអាចចូលរួម សូមចូលទៅកាន់តំណភ្ជាប់សំបុត្រ https://www.bookme.plus/t/events/cbs2025 ។ សម្រាប់ព័ត៌មានបន្ថែម សូមចូលទៅកាន់គេហទំព័ blockchaincambodia.net។

គួរបញ្ជាក់ថា កម្មវិធីនេះ ត្រូវបានសហការរៀបចំដោយ Startup Grind Cambodia, មហាវិទ្យាល័យសេដ្ឋកិច្ចឌីជីថល NUM និងសហគមន៍ប្លុកឆេនកម្ពុជា ដើម្បីផ្តល់ជូននូវ វេទិកាសិក្សា និងអន្តរកម្មដែលរួមបញ្ចូលទាំងសន្និសីទ ការពិភាក្សាតុមូល វគ្គបណ្តុះបណ្តាល កម្មវិធីបង្ហាញសហគ្រិន និងឱកាសបង្កើតបណ្តាញ៕