ថៃពិចារណាសាងសង់ជញ្ជាំង«ព្រំដែនកម្ពុជា»ទប់ស្កាត់ក្រុមឧក្រិដ្ឋជនអនឡាញ

ថៃ៖ ប្រទេសថៃកំពុងតែពិចារណាក្នុងការសាងសង់ជញ្ជាំងព្រំដែនជាមួយនឹងប្រទេសកម្ពុជាដើម្បីទប់ស្កាត់ក្រុមឧក្រិដ្ឋជនអនឡាញដោយជញ្ជាំងព្រំដែននេះនឹងក្លាយជាផ្នែកមួយនៃកិច្ចខិតខំប្រឹងប្រែងដើម្បីលុបបំបាត់ និងទប់ស្កាត់បណ្តាញមជ្ឈមណ្ឌលបោកប្រាស់អនឡាញដែលមានមូលដ្ឋាននៅក្រៅព្រំដែនរបស់ប្រទេសថៃ។

យោងតាមអ្នកនាំពាក្យរដ្ឋាភិបាលថៃលោក Jirayu Houngsub ពេលនេះក្រុមការងារបច្ចេកទេសកំពុងពិចារណា និងសិក្សាបន្ថែមក្នុងការសាងសង់ជញ្ជាំងរបងព្រំដែនជាមួយនឹងប្រទេសកម្ពុជាដើម្បីទប់ស្កាត់ការរីកសាយភាយនៃក្រុមបោកប្រាស់អនឡាញដែលកំពុងតែមានវត្តមានក្បែរៗព្រំដែននៃប្រទេសថៃ ហើយការបង្រ្កាបលើក្រុមឧក្រិដ្ឋជនទាំងនេះពាក់ព័ន្ធនឹងការលាងលុយ ដែលភាគច្រើនដំណើរការដោយក្រុមក្មេងទំនើងចិនដែលមានមូលដ្ឋាននៅក្នុងប្រទេសកម្ពុជា និងមីយ៉ាន់ម៉ា។

សម្រាប់លោក Jirayu Houngsub ការសាងសង់ជញ្ជាំងដែលអាចកើតមាន គឺជាគំនិតមួយដែលត្រូវបានពិភាក្សានៅក្នុងកិច្ចប្រជុំគណៈរដ្ឋមន្ត្រីកាលពីថ្ងៃចន្ទ។ លោកបន្តថា ក្រសួងការបរទេស និងការពារជាតិត្រូវបានចាត់ឲ្យជួបពិភាក្សាលើបញ្ហានេះជាមួយអាជ្ញាធរកម្ពុជា។រដ្ឋាភិបាលកម្ពុជាមិនបានឆ្លើយតបភ្លាមៗចំពោះសំណើសុំការអត្ថាធិប្បាយលើសំណើជញ្ជាំងព្រំដែនថៃនៅឡើយទេ។

គួរបញ្ជាក់ថាប្រទេសថៃ និងកម្ពុជា មានព្រំប្រទល់ជាប់គ្នា ៨១៧ គីឡូម៉ែត្រ។ កន្លងមក ក្រសួងការពារជាតិថៃបានស្នើរធ្វើជញ្ជាំងតាមបណ្តោយព្រំដែនប្រវែង ៥៥ គីឡូម៉ែត្រ ជាច្រើននៅតំបន់ស្រះកែវ-ប៉ោយប៉ែត៕