វិទ្យាស្ថានបារាំងនឹងចាក់បញ្ចាំងភាពយន្តអំពីតួអង្គស្រ្តី និង រៀបចំកិច្ចពិភាក្សាពី «សុខភាពផ្លូវចិត្តស្រ្តី» នៅថ្ងៃទី ៨ មីនា

ភ្នំពេញ៖ វិទ្យាស្ថានបារាំងនៅកម្ពុជានឹងរៀបចំព្រឹត្តិការណ៍ចំនួន៣ នៅថ្ងៃទី ៨ មីនា ដើម្បីអបអរសិទ្ធិនារីអន្តរជាតិ រួមមាន សន្និសីទដោយមានកិច្ចពិភាក្សាជាភាសាខ្មែរ ការចាក់បញ្ចាំងភាពយន្តចំនួន៣ ដែលឆ្លុះបញ្ចាំងឱ្យឃើញអំពីតួអង្គស្ត្រី និង សិក្ខាសាលាស្តីពីការរាំ Breaking & hip hop សម្រាប់កុមារ។

យោងតាមសេចក្តីជូនដំណឹងនៃ វិទ្យាស្ថានបារាំងនៅកម្ពុជា បានឱ្យដឹងថា នៅថ្ងៃទី ៨ មីនា កញ្ញា សេង ហ្គេកលី ដែលជាអ្នកនិពន្ធ និងជាអ្នកផលិតមាតិកាលើបណ្តាញសង្គម ព្រមទាំងកំពុងបន្ដសិក្សាថ្នាក់បរិញ្ញាបត្រជំនាញចិត្តវិទ្យាបច្ចុប្បន្ននេះ នឹងមានវត្តមានក្នុងការចែករំលែកបទពិសោធន៍ពីប្រធានបទ «ភាពជាស្ត្រីនៅខាងក្នុង» សី្តពីសុខភាពផ្លូវចិត្តស្ត្រី។ កម្មវិធីនេះនឹងប្រព្រឹត្តទៅនាវេលាម៉ោង ២ ដល់ ៣ កន្លះរសៀល ដែលអនុញ្ញាតឱ្យសាធារណជនចូលរួមដោយសេរី នៅវិទ្យាស្ថានបារាំងនៅកម្ពុជា ។

ក្រៅពីសិក្ខាសាលា វិទ្យាស្ថាននឹងមានការចាក់បញ្ចាំងភាពយន្តចំនួន៣ ដែលឆ្លុះបញ្ចាំងឱ្យឃើញអំពីតួអង្គស្ត្រី រួមមានរឿង អ្នកអង្គម្ចាស់នាគ ទិព្វសូដាច័ន្ទ និងលោកស្រី Hoffman ។ ជាពិសេស ដើម្បីអបអរសិទ្ធនារីអន្តរជាតិ វិទ្យាស្ថានមានដាក់បញ្ចូលនូវសិក្ខាសាលាស្តីពីការរាំ Breaking & hip hop សម្រាប់កុមារ ជាមួយ BGirl Tinie Rawk ក្នុងភាពជាដៃគូជាមួយ Rombak Battle។

គូររំលឹកផងដែរថា ព័ត៌មានបន្ថែមទាក់ទងនឹងព្រឹត្តិការណ៍ខាងលើ និងបែបបទនៃការចូលរួម អាចចូលទៅកាន់តំណភ្ជាប់ https://www.ifcambodge.com/fr/culture/en-ce-moment/… ៕