ចិនផ្តល់អាហារូបករណ៍ចំនួន៨កន្លែងដល់សិស្សនិស្សិតកម្ពុជាសិក្សានៅសាកលវិទ្យាល័យក្នុងខេត្តក្វាងស៊ី

ភ្នំពេញ៖ ក្រសួងអប់រំ ប្រកាសជ្រើសរើសសិស្សនិស្សិត ប្រលងអាហារូបករណ៍ដើម្បីបន្តការសិក្សានៅប្រទេសចិន សម្រាប់ឆ្នាំសិក្សា២០២៥-២០២៦។ អាហារូបករណ៍នេះ ផ្តល់ជូនសិស្សនិស្សិត៨រូប បន្តការសិក្សាថ្នាក់បរិញ្ញាបត្រ និងថ្នាក់អនុបណ្ឌិត។

យោងតាមសេចក្តីជូនដំណឹងនៃ ក្រសួងអប់រំ បានឱ្យដឹងថា មន្ទីរអប់រំ នៃតំបន់ស្វយ័តជនជាតិក្វាងស៊ី នៃសាធារណរដ្ឋប្រជាមានិតចិន បានផ្តល់អាហារូបករណ៍ចំនួន ០៨កន្លែង ដល់សិស្ស និស្សិត មន្ត្រីរាជការកម្ពុជា ដើម្បីទៅបន្តការសិក្សាថ្នាក់បរិញ្ញាបត្រ និងថ្នាក់អនុបណ្ឌិត នៅតាមសាកលវិទ្យាល័យនានា ក្នុងខេត្តក្វាងស៊ី សម្រាប់ឆ្នាំសិក្សា ២០២៥-២០២៦ខាងមុខនេះ។ លក្ខខណ្ឌទូទៅដែលអាចដាក់អាហារូបករណ៍នេះ គឺ ត្រូវមានសញ្ជាតិខ្មែរ មានចំណេះដឹងភាសាចិន ឬអង់គ្លេសជ្រៅជ្រះ មានសុខភាពល្អ ជាពិសេសត្រូវតែជាអ្នកដែលមិនធ្លាប់ទទួលបានអាហារូបករណ៍របស់ចិន ពីមុនមក។

បើតាមសេចក្តីជូនដំណឹងបានឱ្យដឹងថា ចិនរ៉ាប់រងថ្លៃសិក្សា កន្លែងស្នាក់នៅ និងផ្តល់ប្រាក់អាហារូបករណ៍ប្រចាំខែ។ រីឯថ្លៃសំបុត្រយន្តហោះទៅ-មក ជាបន្ទុករបស់សាមីជន។ ដើម្បីដាក់ពាក្យអាហារូបករណ៍សិក្សា «ថ្នាក់អនុបណ្ឌិត» សិស្សានុសិស្សត្រូវមានលក្ខខណ្ឌមួយចំនួនដូចខាងជា មានអាយុមិនលើសពី ៣៥ឆ្នាំ ព្រមទាំងមានសញ្ញាបត្រថ្នាក់បរិញ្ញាបត្រ ហើយ និងចំណែកឯ បេក្ខជនដែលមានបំណងដាក់អាហារូបករណ៍«ថ្នាក់បរិញ្ញាបត្រ» ដែលមានអាយុមិនលើសពី ២២ឆ្នាំ ហើយមានសញ្ញាបត្រមធ្យមសិក្សាទុតិយភូមិ ឬសញ្ញាបត្រដែលមានតម្លៃសមមូល។ នាយកដ្ឋានសហប្រតិបត្តិការអន្តរជាតិ និងកិច្ចការអាស៊ាន នឹងបន្តទទួលពាក្យពីបេក្ខជនចាប់ពីថ្ងៃនេះតទៅរហូតដល់ថ្ងៃទី២៣ ខែមេសា ឆ្នាំ២០២៥ វេលាម៉ោង ១៦:០០នាទី។

គួរបញ្ជាក់ផងដែរថា មុននឹងអាចទៅកាន់វគ្គបន្តទៀត ក្រោយដាក់ពាក្យ បេក្ខជននឹងឆ្លងកាត់ការប្រឡងនឹងប្រព្រឹត្តទៅ នាថ្ងៃទី០៤ ខែឧសភា ឆ្នាំ២០២៥ ក្រោមវិញ្ញាសាខុសគ្នាទៅតាមកម្រិតដែលបេក្ខជនជ្រើសរើស ។ ថ្នាក់អនុបណ្ឌិត សិស្សនឹងត្រូវប្រលង វប្បធម៌ទូទៅ និងភាសាអង់គ្លេស រីឯថ្នាក់បរិញ្ញាបត្រ សិស្សត្រូវប្រលង គណិតវិទ្យា និងភាសាអង់គ្លេស៕