ចិនគ្រោងប្រលែងពូជកូន«ត្រីសាម៉ុង៩.១លាន»ក្បាលទៅតាមតំបន់ផ្សេងៗ

ចិន៖ ប្រទេសចិនគ្រោងនឹងប្រលែងពូជកូនត្រីសាម៉ុងប្រមាណដល់ទៅ ៩.១លានក្បាលទៅកាន់ទីតាំងនិងតំបន់ដែលមានទឹកជាច្រើនកន្លែងក្នុងប្រទេសចិនដើម្បីអាចឲ្យកូនត្រីសាម៉ុងទាំងអស់នោះបន្តការរស់រានមានជីវិត និងជួយជំរុញនៃការនេសាទត្រីរបស់ប្រជាពលរដ្ឋចិននៅទូទាំងប្រទេស។ ការសម្រេចចិត្តប្រលែងពូជកូនត្រីដ៏ច្រើនសន្ធឹកសន្ធាប់នេះធ្វើឡើងបន្ទាប់ពីប្រទេសចិនសម្រេចជោគជ័យក្នុងការបង្កាត់ពូជត្រីសាម៉ុងរាប់លានក្បាលនៅតំបន់ស្វយ័តស៊ីនជាំងភាគពាយ័ព្យនៃប្រទេសចិន។

យោងតាមប្រព័ន្ធផ្សព្វផ្សាយរដ្ឋចិន CCTV បានឲ្យដឹងថាមូលដ្ឋានបង្កាត់ពូជត្រីសាម៉ុងនៅតំបន់ស្វយ័ត ស៊ីនជាំង ភាគពាយ័ព្យនៃប្រទេសចិន ដែលមានចម្ងាយរាប់ពាន់ម៉ាយពីមហាសមុទ្ររបស់ចិន កំពុងតែសម្រេចជោគជ័យជាខ្លាំងក្នុងការបង្កាត់ពូជកូនត្រីសាម៉ុង។

តាមអ្នកជំនាញបង្កាត់ពូជត្រីចិនបានគូសបញ្ជាក់ថាពេលនេះមានត្រីសាម៉ុងទើបញាស់ថ្មីមានទម្ងន់លើសពី ១០ក្រាម រាប់លានក្បាក់បន្ទាប់ពីចំណាយពេលភ្ញាស់រយៈពេល ៥ ខែ កូនត្រីសាម៉ុងទាំងនេះត្រូវបានតម្រៀបយ៉ាងប្រុងប្រយ័ត្នទៅតាមទំហំ ដាក់ក្នុងទីតាំងផ្សេងៗគ្នា និងផ្តល់ប្រភេទចំណីដែលមានជីវជាតិ ហើយមូលដ្ឋានបង្កាត់ពូជគ្រោងនឹងបញ្ចេញកូនត្រីសាម៉ុងប្រហែល ៩.១ លានក្បាលនៅឆ្នាំនេះទៅក្នុងបឹងតាមតំបន់ភ្នំនាៗ ដោយត្រីសាម៉ុង ទាំងនេះនឹងលូតលាស់ទៅជាត្រីធំៗ ដែលអាចចាប់បានក្នុងរយៈពេលពីរឆ្នាំកន្លះទៅបីឆ្នាំ។

គួរបញ្ជាក់ថាតំបន់ស៊ីនជាំងមានផ្ទៃទឹកជាង ៣លានហិកតា ដែលស័ក្តិសមសម្រាប់ការចិញ្ចឹមពូជត្រីបែបវារីវប្បកម្ម ជាមួយនឹងធនធានទឹកត្រជាក់ដែលមានគុណភាពល្អដែលសម្បូរទៅដោយអុកស៊ីហ្សែន និងបរិយាកាសអំណោយផលសម្រាប់ការលូតលាស់ និងការបង្កាត់ពូជរបស់ត្រីសាម៉ុង៕