«ទស្សនៈយុវជន» ជ្រើសរើសយុវជនចូលរួមប្រកួតជជែកដេញដោលក្រោមមូលបទ ស្រ្តី និងសកលភាវូបនីយកម្ម

ភ្នំពេញ៖ កម្មវិធីជជែកដេញដោល «ទស្សនៈយុវជន »ប្រកាសជ្រើសរើសនិស្សិតដើម្បីចូលរួមប្រកួតជជែកដេញដោលក្រោមមូលបទ ស្រ្តី និងសកលភាវូបនីយកម្ម។ បេក្ខជនដែលត្រូវបានជ្រើសរើសដោយសម្រឹតសម្រាង ព្រមទាំងឆ្លងកាត់វគ្គបណ្តុះបណ្តាល មុននឹងប្រកួតនៅវគ្គពាក់កណ្តាលផ្តាច់ព្រ័ត្រ និងផ្តាច់ព្រ័ត្រ។

យោងតាមលោក យ៉ងសុខ ចំរើន ដែលជាអ្នកដឹកនាំគម្រោង «ទស្សនៈយុវជន» ប្រចាំរដូវកាលទី៥ បានឱ្យដឹងថា នេះជាឆ្នាំទី៥ហើយ ដែល NGO-CEDAW និង RULErs បានសហការរៀបចំកម្មវិធីជជែកដេញដោលដើម្បីផ្តល់ឱកាសដល់យុវជនលើកជាគំនិត និងជជែកវែកញែកនៅជុំវិញប្រធានបទស្ត្រី និងយេនឌ័រ។ ចំណែកឯមូលបទនៃរដូវកាលទី៥ក្នុងឆ្នាំ២០២៤នេះគឺនឹងលើកឡើងពីមូលបទ " ស្រ្តី និងសកលភាវូបនីយកម្ម" ។

បើតាមសេចក្តីជូនដំណឹងនៃគម្រោង«ទស្សនៈយុវជន»បានឱ្យដឹងបន្តទៀតថា ការប្រកួតជជែកដេញដោលនេះ បើកឱកាសសម្រាប់និស្សិតដែលកំពុងសិក្សានៅក្នុងសាកលវិទ្យាល័យណាមួយនៅភ្នំពេញ ដើម្បីមានឱកាសអាចទទួលបានបទពិសោធន៍ បង្កើនភាពក្លាហាននិងចំណេះដឹងថ្មីៗពាក់ព័ន្ធទៅនឹង ស្រ្តី និងសកលភាវូបនីយកម្មព្រមទាំងបានស្គាល់មនុស្សថ្មីៗតាមរយៈការប្រកួត។ បេក្ខជនដែលមានចំណាប់អារម្មណ៍ អាចដាក់ពាក្យតាមរយៈតំណភ្ជាប់ https://forms.gle/pDGkv7WsW3DaYQny6 ឱ្យបានមុនថ្ងៃ ១៤​ មីនា ២០២៥ វេលាម៉ោង១១:៥៩យប់។ ក្នុងករណីមានចម្ងល់ អាចទាក់ទងមកកាន់ក្រុមការងារតាមរយៈគេហទំព័រហ្វេសប៊ុកផ្លូវការ NGO-CEDAW និង ទស្សនៈយុវជន - Youth's Perspectives។

បន្ថែមពីនេះ ដើម្បីក្លាយជាម្ចាស់ជ័យលាភីនៃការជជែកដេញដោល បេក្ខជនត្រូវឆ្លងកាត់ដំណាក់កាលមួយចំនួនដូចជា វគ្គដាក់ពាក្យ វគ្គជម្រុះលទ្ធផលទៅវគ្គសម្ភាសដើម្បីត្រូវបានបង្វឹកពីរបៀបក្នុងការជជែកដេញដោល បូកផ្សំជាមួយនឹងការបណ្តុះបណ្តាលពាក់ព័ន្ធនឹងមូលបទ។ ក្រោយការបង្វឹក និងបណ្តុះបណ្តាលរួច យុវជននឹងត្រូវបានចាប់ក្រុមចេញជា៤ក្រុមដែលមួយក្រុមមានសមាជិកចំនួន ៤រូប ដើម្បីប្រកួតនៅវគ្គពាក់កណ្តាលផ្តាច់ព្រ័ត្រ។ ក្នុងវគ្គពាក់កណ្តាលផ្តាច់ព្រ័ត្រ នឹងមានការជម្រុះពីរក្រុម ដែលអាចបន្តទៅវគ្គផ្តាច់ព្រ័ត្រក្នុងការស្វែងរកម្ចាស់ជ័យលាភីលេខ១។

គួរបញ្ជាក់ផងដែរថា កម្មវិធីជជែកដេញដោល «ទស្សនៈយុវជន» ត្រូវបានសហការរៀបចំរវាង RULErs និង NGO-CEDAW តាំងពីឆ្នាំ២០២១មកម្ល៉េះ ក្រោយពេលដែល RULErs បានលេចចេញជារូបរាងឡើងដោយអតីតនិស្សិតចំនួន៥រូបផ្តួចផ្តើម ដែលរួមមាន លោក យ៉ងសុខ ចំរើន ជាសហស្ថានិកមួយរូប ក្នុងចំណោមសហស្ថាបនិកចំនួន ៥រូប៕