អង្គការសិល្បៈខ្មែរអមតៈ ផ្តល់អាហារូបករណ៍១៥០០ដុល្លារក្នុងមួយឆ្នាំ សម្រាប់យុវជនដែលមានបំណងចាប់ជំនាញក្នុង«វិស័យសិល្បៈវប្បធម៌»

ភ្នំពេញ៖ «កម្មវិធីអាហារូបករណ៍សិល្បៈអមតៈ អាន ចនផន ឆ្នាំ២០២៥-២០២៦» ផ្តល់ជាអាហារូបករណ៍ដើម្បីអភិវឌ្ឍន៍ជំនាញសិល្បៈ និងអភិវឌ្ឍន៍ជំនាញមិនមែនសិល្បៈ តាមរយៈការឧបត្ថម្ភការសិក្សាជាទឹកប្រាក់ចំនួន ១៥០០ ដុល្លារ ក្នុងមួយឆ្នាំ។

បើតាមសេចក្តីជូនដំណឹង បានឱ្យដឹងថា អាហារូបករណ៍នេះមានគោលដៅ ជួយគាំទ្រដល់អ្នកនៅក្នុងវិស័យសិល្បៈវប្បធម៌ដែលត្រូវការឱកាសនេះ អាចសិក្សានិងបញ្ចប់ការសិក្សាជំនាញសិល្បៈវប្បធម៌បានដោយជោគជ័យ អភិវឌ្ឍគុណតម្លៃផ្ទាល់ខ្លួនដែលមានការគិតទូលំទូលាយ និងបណ្តុះសក្តានុពលលើការដឹកនាំក្នុងវិស័យសិល្បៈវប្បធម៌។

បន្ថែមពីការទទួលបានអាហារូបករណ៍ ១៥០០ ដុល្លារ ក្នុងមួយឆ្នាំដើម្បីអភិវឌ្ឍន៍ជំនាញសិល្បៈ និងអភិវឌ្ឍន៍ជំនាញមិនមែនសិល្បៈ យុវជនថែមទាំងមានឱកាសក្នុងការចូលរួមវគ្គបណ្តុះគុណតម្លៃដើម្បីអភិវឌ្ឍខ្លួន និងចំណេះដឹងក្នុងវិស័យសិល្បៈ។​

យុវជនដែលមានបំណងក្នុងការដាក់ពាក្យ អាចទាញយកពាក្យស្នើសុំ និងចូលមើលព័ត៌មានលម្អិតតាមរយៈតំណភ្ជាប់ https://www.cambodianlivingarts.org/kh/opportunities/arn-chorn-pond-living-arts-scholarship/ និងត្រូវដាក់ពាក្យមុនពេលផុតកំណត់ទទួលពាក្យ៖ ថ្ងៃទី ៣១ ខែឧសភា ឆ្នាំ ២០២៥។ ក្នុងករណីមានចម្ងល់បន្ថែមសូមទាក់ទងទៅកាន់៖ [email protected] ឬ តាមលេខទូរស័ព្ទនេះ៖ ០១០ ៩៤១ ២២៤៕