«ល្ខោនបាមោជ្ជទ័យ» រឿងកុលាបប៉ៃលិន នឹងសម្តែងជូនទស្សនាដោយសេរី នៅថ្ងៃស្អែក ម៉ោង៦ល្ងាច

ភ្នំពេ​ញ​៖ នាយកដ្ឋានសិល្បៈទស្សនីយភាព នឹងរៀបចំការសម្តែង «ល្ខោនបាមោជ្ជទ័យ» រឿងកុលាបប៉ៃលិន នឹងផ្តល់ជូនទស្សនាដោយសេរីនៅថ្ងៃស្អែក ម៉ោង៦ល្ងាច នៅ ផ្សារទំនើប ជីប ម៉ុង ២៧១ មេហ្គាម៉ល។

បើតាមគេហទំព័រហ្វេសប៊ុកនៃ នាយកដ្ឋានសិល្បៈទស្សនីយភាព បានឱ្យដឹងថា នាយកដ្ឋានសិល្បៈទស្សនីយភាព បានសហការជាមួយ ផ្សារទំនើប ជីប ម៉ុង ២៧១ មេហ្គាម៉ល ដើម្បីរៀបចំការសម្តែងល្ខោនបាមោជ្ជទ័យ រឿងកុលាបប៉ៃលិន ជូនទស្សនាដោយសេរី នាថ្ងៃទី ១ ខែមីនា ឆ្នាំ២០២៤ វេលាម៉ោង៦ល្ងាច។

រឿងកុលាបប៉ៃលិន ជារឿងអក្សរសិល្ប៍ខ្មែរមួយដែលតែងតែត្រូវបានលើកឡើងក្នុងការសិក្សានៅថ្នាក់វិទ្យាល័យ អាស្រ័យហេតុនេះ វាជាចំណងជើងមួយដែលមានយុវជនជាច្រើនបានស្គាល់ និងមានចំណាប់អារម្មណ៍ក្នុងការមើលទស្សនីយភាពសម្តែង បន្ថែមពីការអានសៀវភៅ ដើម្បីទទួលបានអារម្មណ៍ថ្មី និងប្លែកពីសព្វដង។

សិល្បករ សិល្បការិនី នាយកដ្ឋានសិល្បៈទស្សនីយភាពនៃក្រសួងវប្បធម៌និងវិចិត្រសិល្បៈ កាលពីថ្ងៃទី ១៤ សម្តែងជាលើកទី២ ល្ខោនបាមោជ្ជទ័យរឿង"កុលាបប៉ៃលិន" ជូនថ្នាក់ដឹកនាំ និងសាធារណៈជនទស្សនា នៅសាលសន្និសីទចតុមុខផងដែរ។

គួរបញ្ជាក់ផងដែរថា «ល្ខោនបាមោជ្ជទ័យ» ទទួលបានចំណាប់អារម្មណ៍ខ្ពស់ក្នុងរយៈពេលចុងក្រោយបន្ទាប់ពីមិនសូវទស្សនីយភាពជាច្រើនឆ្នាំ។ ទស្សនីយភាពល្ខោនប៉ាមោជ្ជទ័យ​ រឿងកុលាបប៉ៃលិននេះ ត្រូវបានដឹកនាំដោយសាស្រ្តាចារ្យ ណុប សម្បត្តិ និងសាស្រ្តាចារ្យ អ៊ុយ លតាវណ្ណ៕