ភាពយន្តឯកសារខ្មែរចំនួនពីរបាន«ជ័យលាភីលេខ២និងលេខ៣» ក្នុងមហោស្រពភាពយន្តនៅភូមា

ភ្នំពេញ៖ ភាពយន្តឯកសារខ្មែរពីរ និយាយពី «នំបញ្ចុក និង ពិធីបុណ្យអុំទូក» បានជ័យលាភីលេខ​២ និងលេខ ៣ ក្នុងមហោស្រពភាពយន្ត Mekong Creative Film Festival នៅប្រទេសភូមា។

បើតាម គេហទំព័រផ្លូវការនៃស្ថានទូតកម្ពុជាប្រចាំទីក្រុងយ៉ាងហ្គូន បានឱ្យដឹងថា កម្ពុជាបានចូលរួមក្នុង ងមហោស្រពភាពយន្ត Mekong Creative Film Festival នៅប្រទេសភូមា ផ្តោតលើប្រធានបទ «ល្បែងប្រជាប្រិយ និងអាហារ - Traditional Games and Foods» ។​

នៅក្នុងមហោស្រពភាពយន្តនេះ យុវជនកម្ពុជាបានលើកយកភាពយន្តឯកសារចំនួនពីរដើម្បីដាក់ពាក្យចូលរួមក្នុងនោះមានរឿងពាក់ព័ន្ធនឹងនំបញ្ចុក និង ពិធីបុណ្យអុំទូក។ កម្ពុជាបានតាំងពិព័រណ៍រូបថតបង្ហាញពីម្ហូបអាហារ ការប្រណាំងទូក ទេសភាពក្រុងភ្នំពេញ និងដាក់បញ្ចាំងខ្សែភាពយន្តឯកសារខ្លីស្តីពីល្បែងប្រជាប្រិយកម្ពុជាផងដែរ។

ជាសមិទ្ធផល ភាពយន្តឯកសារដែលផលិតដោយយុវជនកម្ពុជាបានទទួលចំណាត់ថ្នាក់លេខ ២​ និងចំណាត់ថ្នាក់លេខ ៣ ខណៈភូមាជាម្ចាស់ផ្ទះបានជ័យលាភីលេខ១។ បើតាមស្ថានទូត បាន​ឱ្យដឹងបន្តទៀតថាមហោស្រពនេះមានផលិតករភាពយន្ត និងសិល្បករចំនួនប្រមាណ ៥០០នាក់។

មហោស្រពភាពយន្ត Mekong Creative Film Festival ជាកម្មវិធីប្រកួតភាពយន្តឯកសារខ្នាតខ្លីថ្នាក់តំបន់ទន្លេមេគង្គដែលមានការបើកឱ្យប្រទេសដែលអាចដាក់ពាក្យប្រកួតបានរួមមាន កម្ពុជា ឡាវ ភូមា ថៃ រៀតណាម និងកូរ៉េ៕