ឱកាសសម្រាប់យុវជនចូលរួមស្ម័គ្រចិត្តក្នុង «មហោស្រពភាពយន្តអន្តរជាតិកម្ពុជា​» លើកទី១៤

ភ្នំពេញ៖ «មហោស្រពភាពយន្តអន្តរជាតិកម្ពុជា​លើកទី១៤» បើកជ្រើសរើសអ្នកស្ម័គ្រចិត្ត ដើម្បីចូលរួមរៀបចំកម្មវិធីនាថ្ងៃទី ២១-២៩ មីនា ២០២៥ ដើម្បីនាំយកភាពយន្តខ្មែរឱ្យទស្សនិកជនជាតិ និងអន្តរជាតិ។

បើតាមគេហទំព័រនៃ «មហោស្រពភាពយន្តអន្តរជាតិកម្ពុជា​» បានឱ្យដឹងថា នេះជាលើកទី១៤ហើយដែល «មហោស្រពភាពយន្តអន្តរជាតិកម្ពុជា​» បានប្រព្រឹត្តទៅក្នុងគោលបំណងនាំយកភាពយន្តខ្មែរឱ្យទស្សនិកជនជាតិ និងអន្តរជាតិ ព្រមទាំងនាំយកនូវភាពយន្តអន្តរជាតិដែលបង្កប់តម្លៃអប់រំ មកណែនាំជូនប្រជាជនកម្ពុជាបានស្គាល់ ដើម្បីអាចផ្តោះប្តូរវប្បធម៌រវាងជាតិ និងអន្តរជាតិតាមរយៈវិស័យភាពយន្ត។

នាឆ្នាំ២០២៥នេះមហោស្រពនៅតែបន្តផ្តល់ឱកាសឱ្យយុវជនអាចចូលរួមស្ម័គ្រចិត្តដើម្បីបន្តបេសកកម្មជាមួយខ្លួន ដែលក្នុងនោះបើកទទួលពាក្យតាមអនឡាញរហូតដល់ថ្ងៃទី ៤ មីនា ២០២៥ តាមរយៈតំណភ្ជាប់៖ https://forms.gle/fKADb42vcPb2fFC29 ។ តាមរយៈការងារស្ម័គ្រចិត្តជាមួយមហោស្រព

យុវជននឹងទទួលបានបទពិសោធន៍ការងារ ដោយការធ្វើការជាមួយក្រុមបច្ចេកទេស និងជួបជាមួយអ្នកដែលមានបទពិសោធន៍ជាច្រើនក្នុងវិស័យភាពយន្ត។

គួរបញ្ជាក់ផងដែរថា «មហោស្រពភាពយន្តអន្តរជាតិកម្ពុជាលើកទី១៣»បានប្រព្រឹត្តទៅនៅថ្ងៃទី២៦ ដល់ថ្ងៃអាទិត្យ ទី៣០ ខែមិថុនា ២០២៤ ដែលទស្សនិកជនចូលទស្សនាភាពយន្តដោយឥតគិតថ្លៃ ជាង ១៥០ រឿង មកពី ៤០ ប្រទេស កាលពីឆ្នាំមុន៕