ក្រសួងកិច្ចការនារីរៀបចំកម្មវិធីចែករំលែកស្តីពី «ការរៀបចំរបាយការណ៍ហិរញ្ញវត្ថុ» នៅថ្ងៃទី ២៨ កុម្ភៈ

ភ្នំពេញ៖ ក្រសួងកិច្ចការនារីរៀបចំកម្មវិធីចែករំលែកស្តីពី «ការរៀបចំរបាយការណ៍ហិរញ្ញវត្ថុ» នៅថ្ងៃសុក្រ ទី២៨ ខែកុម្ភៈ ឆ្នាំ២០២៥ ចាប់ពីម៉ោង ៨:៣០ ព្រឹក នៅទីតាំងមជ្ឈមណ្ឌលអភិវឌ្ឍន៍សហគ្រិនភាពស្រ្តី (WEDC) នៅជិតវិទ្យាល័យវត្តភ្នំ។

បើតាមគេហទំព័រនៃក្រសួងកិច្ចការនារីបានឱ្យដឹងថា “ការរៀបចំរបាយការណ៍ហិរញ្ញវត្ថុ” ជាប្រធានបទទី៤ហើយដែលបានរៀបចំឡើងក្រោមកម្មវិធីជជែកពិភាក្សា “តស់! និយាយពីហិរញ្ញវត្ថុ និងឌីជីថល” ដែលរៀបចំឡើងដោយក្រសួងកិច្ចការនារី។ វាគ្មិនដែលនឹងចែករំលែកពីប្រធានបទនេះ គឺ កញ្ញា លឹម ឆរីកា ដែលជាប្រធានគ្រប់គ្រងផ្នែកនិពន្ធសៀវភៅ និងសហស្ថាបនិកនៃកាក់សេន (Kakcent)។

ប្រធានបទ “ការរៀបចំរបាយការណ៍ហិរញ្ញវត្ថុ” នឹងបង្ហាញអំពី វិធីសាស្ត្រក្នុងការវិភាគរបាយការណ៍ចំណេញ-ខាត និងគន្លឹះក្នុងការកត់ត្រាអាជីវកម្មឲ្យបានត្រូវ ដើម្បីអោយម្ចាស់អាជីវកម្ម ឬអ្នកមានបំណងចង់ធ្វើអាជីវកម្ម មានគំនិតកាន់តែច្រើនឡើង ហើយប្រតិបត្តិការណ៍អ្វីខ្លះដែលត្រូវតាមដាន ហើយធ្វើការគ្រប់គ្រងឲ្យបានល្អ។កម្មវិធីនឹងប្រព្រឹត្តទៅនាថ្ងៃសុក្រ ទី២៨ ខែកុម្ភៈ ឆ្នាំ២០២៥ ចាប់ពីម៉ោង ៨:៣០ នាទីព្រឹកតទៅ នៅទីតាំង៖ មជ្ឈមណ្ឌលអភិវឌ្ឍន៍សហគ្រិនភាពស្រ្តី (WEDC) នៅជិតវិទ្យាល័យវត្តភ្នំ។

ប្រសិនបើមានចំណាប់អារម្មណ៍ សូមចុះឈ្មោះចាប់ពីថ្ងៃនេះតទៅតាមតំណ ៖ https://forms.gle/cC85pp1okfZyKdfi6។ ស្រ្តីសហគ្រិន ស្រ្តីវ័យក្មេង សិស្ស និស្សិត និងអាជីវករ នឹងចូលរួមដោយសេរីជាមួយកម្មវិធីក្នុងការទទួលបានចំណេះដឹងលើការគ្រប់គ្រងអាជីវកម្មខ្នាតមីក្រូ និងតូច និងអាចក្លាយខ្លួនជាអ្នកផ្សព្វផ្សាយអំពីព័ត៌មាន និងវិធីសិក្សាដោយខ្លួនឯងតាមរយៈបណ្តាញសង្គមរបស់ក្រសួងកិច្ចការនារី និងស្ថាប័នផ្សេងៗដែលបានផ្សព្វផ្សាយអំពីការអភិវឌ្ឍសហគ្រិនភាព តាមរយៈចំណេះដឹងហិរញ្ញវត្ថុ និងឌីជីថល។

គួរបញ្ជាក់ផងដែរថាកម្មវិធី “តស់! និយាយពីហិរញ្ញវត្ថុ និងឌីជីថល” ដែលរៀបចំឡើងដោយក្រសួងកិច្ចការនារី មានគោលបំណង ផ្សព្វផ្សាយ និងលើកកម្ពស់ចំនេះដឹងហិរញ្ញវត្ថទៅដល់សហគ្រិនស្រ្តី និងស្រ្តីវ័យក្មេងដែលមានបំណងអភិវឌ្ឍន៍ភាពជាសហគ្រិនរបស់ខ្លួន តាមរយៈការស្វែងយល់ពីការគ្រប់គ្រងអាជីវកម្ម និងការគាំទ្ររបស់ស្ថាប័នពាក់ព័ន្ធ និងគម្រូភាពសហគ្រិនស្រ្តីដែលជោគជ័យកន្លងមក៕