អង្គការ Tilting Future ផ្តល់ឱកាសដល់យុវជនកម្ពុជាចុះកម្មសិក្សា៣ខែ​នៅម៉ាឡេស៊ី ឬ អាហ្រ្វិកខាងត្បូង

ភ្នំពេញ៖ អង្គការ Tilting Future ផ្តល់ឱកាសដល់យុវជនកម្ពុជាចុះកម្មសិក្សា៣ខែ​នៅម៉ាឡេស៊ី ឬ អាហ្រ្វិកខាងត្បូង តាមរយៈការចូលរួមកម្មវិធី Take Action Lab ដែលបើកទទួលពាក្យដល់ថ្ងៃ១៤ មីនា ឆ្នាំ២០២៥។

បើតាមគេហទំព័រនៃ tiltingfutures.org បានឱ្យដឹងថា កម្មវិធី Take Action Lab ដែលបង្កើតដោយអង្គការ Tilting Future គឺជាកម្មវិធីសិក្សាសម្រាប់យុវជនដែលចង់ធ្វើការផ្លាស់ប្តូរសង្គម ដែលកម្មវិធីនេះបង្រៀនជំនាញ និងផ្តល់បទពិសោធន៍សំខាន់ៗ ដើម្បីស្វែងយល់បន្ថែមពីការ ដោះស្រាយបញ្ហាដែលកើតមាននៅពិភពលោក ។

តាមរយៈការចូលរួមកម្មវិធីនេះ យុវជននឹងចំណាយពេល ៣ ខែក្នុងការចុះកម្មសិក្សាអង្គការក្នុង សហគមន៍ បន្ថែមជាមួយការរៀនពីវប្បធម៌ផ្សេងៗពីអ្នកចូលរួមចម្រុះជាតិសាសន៍ និងជាពិសេស អភិវឌ្ឍភាពជាអ្នកដឹកនាំ។ បន្ថែមពីនេះ យុវជននឹងមានឱកាសបង្កើតទំនាក់ទំនងអន្តរជាតិចម្រុះជាតិសាសន៍ជាមួយអ្នកចូលរួមដទៃទៀត និង ចូលរួមក្នុងការស្វែងយល់ពីវប្បធម៌អន្តរជាតិ និងការអភិវឌ្ឍខ្លួនឯង។

កម្មសិក្សាសម្រាប់ឆ្នាំ២០២៥ - ២០២៦ នឹងប្រព្រឹត្តទៅនៅទីតាំងពីរគឺ ទីក្រុង George ដែលស្ថិតនៅប្រទេសម៉ាឡេស៊ី (Malaysia ) ដែលផ្តោតលើប្រធានបទទាក់ទងនឹងបរិស្ថាន។ ចំណែកឯ ទីក្រុង Cape នៃ អាហ្វ្រិកខាងត្បូង (South Africa) មានការផ្តោតប្រធានបទទាក់ទងសិទ្ធមនុស្ស និងសង្គមយុត្តិធម៌។​

លក្ខខណ្ឌដែលសិស្សអាចដាក់ពាក្យបានមានដូចតទៅ ដែលមានយុវជនអាយុ 17-21 ឆ្នាំ ព្រមទាំងជាសិស្សកំពុងសិក្សាក្នុងសកលវិទ្យាល័យ (Take Action Lab Accelerator) និងជាអ្នកដែលមានចំណង់ចំណូលចិត្តក្នុងការផ្លាស់ប្តូរ ចង់រៀន ចង់បានបទពិសោធនក្នុងការធ្វើការក្នុងបរិបទវប្បធម៌ផ្សេងៗ

ប្រសិនបើមានចំណាប់អារម្មណ៍សូមដាក់ពាក្យតាមរយៈតំណភ្ជាប់៖ tiltingfutures.org  ដោយធ្វើការដាក់ពាក្យមុនថ្ងៃ១៤ មីនា ឆ្នាំ២០២៥។

កម្មវិធីនឹងប្រព្រឹត្តទៅដំណាក់កាលផ្សេងៗគ្នាដែលសិស្សអាចជ្រើសរើស ដូចជា វគ្គ Accelerator (សម្រាប់សិស្សសកល): មិថុនា 2025 - សីហា 2025, Fall Cohort: សីហា 2025 - ធ្នូ 2025, Spring Cohort: កុម្ភៈ 2026 - ឧសភា 2026។

គួរបញ្ជាក់ផងដែរថា យុវជនកម្ពុជា ៣រូប ធ្លាប់តំណាងចូលរួមកម្មវិធី Take Action Lab នេះកន្លងមកដែលមាន កញ្ញា ហេង សូផានីតា ជាយុវជនដំបូងបង្អស់ដែលត្រូវបានជ្រើសរើសក្នុងកម្មវិធីនេះ ដោយធ្វើការចុះកម្មសិក្សានៅអង្គការមួយនៅអាហ្រ្វិកខាងត្បូងរយៈពេលបីខែ៕