លោកស្រី ស្រូយ សុជាតិ៖ មិនថាអ្នកជាអ្នកណា រាល់សកម្មភាពវិជ្ជមានរបស់អ្នក នឹងជួយអភិវឌ្ឍសង្គម

ភ្នំពេញ៖ លោកស្រី ស្រូយ សុជាតិ អគ្គនាយក នៃអគ្គនាយកដ្ឋានយុវជន ក្រសួងអប់រំ បានលើកឡើងថា «មិនថាអ្នកជាអ្នកណា រាល់សកម្មភាពវិជ្ជមានរបស់អ្នក នឹងជួយអភិវឌ្ឍសង្គម»។ ការថ្លែងរបស់លោកស្រីបែបនេះ ធ្វើឡើងក្នុងសន្និបាតអប់រំ យុវជន និងកីឡា ឆ្នាំ២០២៥។

លោកស្រី ស្រូយ សុជាតិ អគ្គនាយក នៃអគ្គនាយកដ្ឋានយុវជន ក្រសួងអប់រំ ​​ បានលើកឡើងថា នៅក្នុងឆ្នាំសិក្សា ២០២៣-២០២៤ មានយុវជនប្រមាណ ១១៧០០ នាក់ដែលទទួលបានការអភិវឌ្ឍសមត្ថភាពតាមរយៈកម្មវិធីទាំងអស់ដែលនាយកដ្ឋានបានរៀបចំឡើងសម្រាប់យុវជន ដែលក្នុងនោះ មានដូចជា ការស្ម័គ្រចិត្តដើម្បីសហគមន៍ខ្ញុំ ការប្រកួតប្រជែងអ្នកស្ម័គ្រចិត្តឆ្នើម ការតម្រង់ទិសការសិក្សា និងការងារ ការជជែកដេញដោលថ្នាក់ខេត្ត និងថ្នាក់ជាតិ និងកម្មវិធីផ្សេងៗជាច្រើនទៀត។ បើតាមប្រសាសន៍របស់លោកស្រី ស្រូយ សុជាតិ នៅក្នុងសន្និបាតអប់រំ នាថ្ងៃទី ២៥ កុម្ភៈ ២០២៥ ក្នុងមួយឆ្នាំនាយកដ្ឋានបានធ្វើយ៉ាងហោចណាស់ ៧០ កម្មវិធីផ្សេងៗគ្នា។

ថ្វីត្បិតបានសម្រេចនូវសមិទ្ធផលជាច្រើន មានបញ្ហាប្រឈមមួយចំនួនដូចជា កម្មវិធីយុវជននៅមិនទាន់ឆ្លើយតបនឹងតម្រូវការរបស់យុវជននៅតាមរាជធានីខេត្ត ព្រមទាំងធនធានមនុស្សដែលមានវិជ្ជាជីវៈការអភិវឌ្ឍយុវជន នៅមិនទាន់ឆ្លើយតបនឹងតម្រូវការកម្មវិធីយុវជន។ ទោះជាយ៉ាងណាក៏ដោយ លោកស្រីលើកឡើងថា នាយកដ្ឋាននឹងបន្តដំណើរឱ្យកាន់តែប្រសើរឡើង តាមរយៈការអនុវត្តនូវវិធានការមួយចំនួនដូចជា ធ្វើទំនើបកម្ម និងពង្រីកកម្មវិធីយុវជនឱ្យឆ្លើយតបនឹងតម្រូវការយុវជននៅតាមរាជធានីខេត្ត បង្កើនសហប្រតិបត្តិការជាមួយដៃគូពាក់ព័ន្ធ ក្រសួង ស្ថាប័នឯកជន​ ឬអង្គការនានា ព្រមទាំងអភិវឌ្ឍធនធានមនុស្សដែលមានវិជ្ជាជីវៈការអភិវឌ្ឍយុវជនឆ្លើយតបនឹងតម្រូវការកម្មវិធីយុវជន។

ជាចុងក្រោយ លោកស្រី បានមានសារមួយផ្តាំផ្ញើទៅកាន់យុវជនថា មិនថាអ្នកជាអ្នកណា អ្នកនៅទីណា រាល់សកម្មភាពវិជ្ជមានរបស់អ្នក នឹងជួយអភិវឌ្ឍសង្គម ដែលលោកស្រីលើកទឹកចិត្តឱ្យយុវជនគ្រប់រូបចូលរួមចំណែកក្នុងការបង្កើតឱ្យមានភាពវិជ្ជមានក្នុងសហគមន៍របស់ខ្លួន៕