បណ្ឌិត​​ ជេត ជាលី៖ សាកលវិទ្យាល័យមានតួនាទីសំខាន់ក្នុងការរៀបចំយុវជនឱ្យមាន «ជំនាញត្រូវនឹងទីផ្សារការងារ»

ភ្នំពេញ៖ បណ្ឌិត ជេត ជាលី សាកលវិទ្យាធិការសាកលវិទ្យាល័យភូមិន្ទភ្នំពេញ​​ បានលើកឡើងថា សាកលវិទ្យាល័យមាននាទីសំខាន់ក្នុងការរៀបចំយុវជនឱ្យមាន «ជំនាញត្រូវនឹងទីផ្សារពលកម្ម» នៅក្នុងសង្គមមួយដែលមានការប្រែប្រួលយ៉ាងឆាប់រហ័សដោយឥទ្ធិពលបច្ចេកវិទ្យា។ ការថ្លែងរបស់លោកសាកលវិទ្យាធិការបែបនេះ ធ្វើឡើងក្នុងសន្និបាតអប់រំឆ្នាំ២០២៥។

បណ្ឌិត ជេត ជាលី សាកលវិទ្យាធិការសាកលវិទ្យាល័យភូមិន្ទភ្នំពេញ​​ បានលើកឡើងថា ក្នុងរយៈពេលប៉ុន្មានឆ្នាំចុងក្រោយ ឥទ្ធិពលនៃបច្ចេកវិទ្យាបានជះឥទ្ធិពលយ៉ាងឆាប់រហ័សមកលើការអប់រំក្នុងប្រទេសកម្ពុជា និងទីផ្សារការងារ។ នៅក្នុងនោះ លោកបានលើកឡើងពីការព្យាករណ៍របស់វេទិកាសេដ្ឋកិច្ចពិភពលោក (World Economic Forum) ថាជំនាញជាច្រើននឹងត្រូវបាត់ពីទីផ្សារការងារ ហើយបរិបទថ្មីនេះនឹងបង្កើតការងារថ្មីជាច្រើន ព្រោះពិភពលោកកំពុងប្រែប្រួលយ៉ាងរហ័សដោយសារតែឥទ្ធិពលនៃបច្ចេកវិទ្យា។នេះបើតាមរបាយការណ៍នៃ «អនាគតការងារឆ្នាំ២០២៥» ដោយវេទិកាសេដ្ឋកិច្ចពិភពលោកបានឱ្យដឹងថា បច្ចេកវិទ្យានឹងមានឥទ្ធិពលលើការផ្លាស់ប្តូរឧស្សាហកម្ម និងការងារ ចក្ខុវិស័យការងារ និងជំនាញក្នុងរយៈពេល៥ឆ្នាំខាងមុខ។

បណ្ឌិត ជេត ជាលី បានលើកឡើងថា សាកលវិទ្យាល័យ និងអ្នកអប់រំ ត្រូវយកចិត្តទុកដាក់លើគម្លាតជំនាញ និងគម្លាតគុណភាព ព្រោះថាទីផ្សារពលកម្មកំពុងតែមានភាពប្រែប្រួល បើមិនដូច្នោះទេ យុវជននឹងមិនមានជំនាញដែលត្រូវនឹងទីផ្សារការងារនាពេលខាងមុខនោះទេ។ អាស្រ័យហេតុនេះ ប្រសិនបើវិស័យអប់រំនៅតែប្រព្រឹត្តទៅតាមវិធីដដែល នោះវានឹងជះឥទ្ធិពលជាខ្លាំងទៅលើគម្លាតជំនាញ និងគម្លាតគុណភាព។

ដើម្បីឆ្លើយតបនឹងបញ្ហាគម្លាតជំនាញ និងគម្លាតគុណភាព ដើម្បីបន្ស៊ីជាមួយនឹងទីផ្សារពលកម្ម បណ្ឌិត ជេត ជាលី ផ្តល់ជាអនុសាសន៍ឱ្យសាកលវិទ្យាល័យមានការអភិវឌ្ឍបំណិនថ្មីៗដោយព្យាយាមឈ្វេងយល់ពីទីផ្សារពលកម្ម និងតម្រូវការការងារក្នុងសង្គមបច្ចុប្បន្នដែលមានការប្រែប្រួលយ៉ាងរហ័ស។ ទី២ សាលារៀនត្រូវមានការកែលំអកម្មវិធីសិក្សា និងរបៀបនៃការបង្រៀន ដើម្បីឆ្លើយតបនឹងជំនាញ​និងគុណភាពដែលទីផ្សារពលកម្មត្រូវការ។ ទី៣ គឺត្រូវមានការសហការគ្នារវាងសាកលវិទ្យាល័យ និងសហគ្រាស ដើម្បីចៀសវាងគម្លាតជំនាញនៃយុវជន និងទីផ្សារការងារ ។

ជាចុងក្រោយ បណ្ឌិត ជេត ជាលី បានរៀបរាប់ថា ការសហការគ្នារវាងស្ថាប័នពាក់ព័ន្ធ ដូចជាគ្រឹះស្ថានសិក្សា ក្រុមហ៊ុនឯកជន អង្គការ រដ្ឋាភិបាល និងភ្នាក់ងារពាក់ព័ន្ធ ដើរតួនាទីយ៉ាងសំខាន់ក្នុងការចូលរួមចំណែកកាត់បន្ថយគម្លាតជំនាញនិងគុណភាព​ដែលអាចអនុញ្ញាតឱ្យយុវជនបង្កើនឱកាសក្នុងការមានការងារធ្វើត្រូវជាមួយនឹងទីផ្សារការងារ។

គួរបញ្ជាក់ផងដែរថា លោក ជេត ជាលី ជាសាកលវិទ្យាធិការសាកលវិទ្យាល័យភូមិន្ទភ្នំពេញ​​ បានចូលរួមធ្វើបទបង្ហាញនៅក្នុងសន្និបាតអប់រំ បានលើកប្រធានបទ «អភិវឌ្ឍមូលធនមនុស្សឆ្ពោះទៅកាន់ចក្ខុវិស័យកម្ពុជា២០៥០» នាថ្ងៃទី ២៥ កុម្ភៈ ២០២៥៕