SEAMEO ប្រកាសជ្រើសរើសអ្នកឯកទេសផ្នែក «ស្រាវជ្រាវ និងវាយតម្លៃ» ធ្វើការ៣ឆ្នាំនៅថៃ

ភ្នំពេញ៖ ក្រសួងអប់រំប្រកាសជាសាធារណៈ ពាក់ព័ន្ធនឹងសំណើសុំចាត់តាំងបេក្ខជនដាក់ពាក្យដើម្បីចូលរួមប្រកួតប្រជែងមុខតំណែងអ្នកឯកទេស ផ្នែកស្រាវជ្រាវ និងវាយតម្លៃ នៅលេខាធិការដ្ឋានស៊ីមេអូ ទីក្រុងបាងកក ប្រទេសថៃ។

បើតាមសេចក្តីជូនដំណឹងនៃក្រសួងអប់រំបានឱ្យដឹងថា លេខាធិការដ្ឋានស៊ីមេអូ បានប្រកាសជ្រើសរើសបេក្ខជនដាក់ពាក្យដើម្បីបំពេញតួនាទីជាអ្នកឯកទេស ផ្នែកស្រាវជ្រាវ និងវាយតម្លៃ (Research, Evaluation and Assessment Specialist) នៅលេខាធិការដ្ឋានស៊ីមេអូ ទីក្រុងបាងកក ប្រទេសថៃ ក្នុងមួយអាណត្តិរយៈពេល ០៣ឆ្នាំ។

ដើម្បីអាចដាក់ពាក្យបាន បេក្ខជនត្រូវមានលក្ខខណ្ឌដូចខាងក្រោម៖

-មានសញ្ញាបត្រ ចាប់ពីបរិញ្ញាបត្រជាន់ខ្ពស់ឡើងទៅ លើជំនាញស្រាវជ្រាវអប់រំ អប់រំសេដ្ឋកិច្ច ស្ថិតិ ឬវិទ្យាសាស្ត្រសង្គម

-មានបទពិសោធន៍វិជ្ជាជីវៈ ក្នុងការស្រាវជ្រាវ និងវាយតម្លៃទាក់ទងនឹងការអប់រំបែបស្រាវជ្រាវ និងវាយតម្លៃក្នុងអង្គការអន្តរជាតិ ឬទីភ្នាក់ងារស្ថាប័នអភិវឌ្ឍន៍នានា និងមានសមត្ថភាពក្នុងការវាយតម្លៃសកម្មភាពអប់រំ

-មានបទពិសោធន៍វិជ្ជាជីវៈយ៉ាងតិច ០៥ឆ្នាំ ក្នុងវិស័យអប់រំ វិទ្យាសាស្ត្រ និងវប្បធម៌

-អាចប្រើប្រាស់ភាសាអង់គ្លេស និងប្រព័ន្ធព័ត៌មានវិទ្យាបានយ៉ាងស្ទាត់ជំនាញ

-មានអាកប្បកិរិយា និងសុខភាពល្អទាំងផ្លូវកាយនិងផ្លូវចិត្ត។

មុខតំណែងនេះទទួលខុសត្រូវជាចម្បងសម្រាប់ការបង្កើត និងកសាងមូលដ្ឋានភស្តុតាងដ៏រឹងមាំសម្រាប់គោលនយោបាយ និងការអនុវត្តក្នុងវិស័យអប់រំ វិទ្យាសាស្ត្រ និងវប្បធម៌ និងសម្រាប់ការសម្របសម្រួលសកម្មភាព កម្មវិធី និងគម្រោងទាំងអស់ដែលទាក់ទងនឹងការស្រាវជ្រាវ និងការវាយតម្លៃ។ លទ្ធផលសំខាន់ៗនៃតួនាទីនេះ គាំទ្រដល់ការអភិវឌ្ឍន៍ការផ្តល់ប្រឹក្សាគោលនយោបាយ និងកម្មវិធីអភិវឌ្ឍន៍ ដែលឆ្លើយតបទៅនឹងតម្រូវការរបស់ប្រទេសសមាជិក SEAMEO និងតំបន់អាស៊ីអាគ្នេយ៍។

ដើម្បីទាញយកសំណើសុំដាក់ពាក្យ និងទទួលបានព័ត៌មានលម្អិតបន្ថែម សូមស្តេន QR Code ដែលមានភ្ជាប់ខាងក្រោម ។ សូមបញ្ជូនឈ្មោះបេក្ខភាពចូលរួមមកការិយាល័យស៊ីមេអូ នៃនាយកដ្ឋានសហប្រតិបត្តិការអន្តរជាតិ និងកិច្ចការអាស៊ាន ឱ្យបានមុនថ្ងៃទី០៧ ខែមីនា ឆ្នាំ២០២៥។

គួរបញ្ជាក់ផងដែរថា SEAMEO មានឈ្មោះពេញ The Southeast Asian Ministers of Education Organization គឺជាអង្គការអន្តររដ្ឋាភិបាលក្នុងតំបន់ដែលត្រូវបានបង្កើតឡើងក្នុងឆ្នាំ 1965 ក្នុងចំណោមរដ្ឋាភិបាលនៃប្រទេសអាស៊ីអាគ្នេយ៍ ដើម្បីលើកកម្ពស់កិច្ចសហប្រតិបត្តិការក្នុងតំបន់ក្នុងវិស័យអប់រំ វិទ្យាសាស្ត្រ និងវប្បធម៌៕