កម្ពុជាមាន «សាលារៀនទូទាំងប្រទេស» ជិត ២ម៉ឺន ដែលមានសិស្ស-និស្សិតសរុបជាង ៤លាននាក់

ភ្នំពេញ៖ ក្រសួងអប់រំ​ នាថ្ងៃទី២៤ កុម្ភៈ ២០២៥ ក្នុងសន្និបាតអប់រំប្រចាំឆ្នាំ២០២៥ បានជូនដំណឹងថាក្នុងឆ្នាំសិក្សា២០២៤-២០២៥ កម្ពុជាមានចំនួនសាលារៀន នៅទូទាំងប្រទេសសរុប ១៩៥៩១ សាលា ក្នុងនោះ ដែលមាន សិស្ស និងនិស្សិតសរុប ៤ ១៧១៩៦២ នាក់ ។

បើតាមរបាយការណ៍នៃក្រសួងអប់រំ បានឱ្យដឹងថា គិតត្រឹមឆ្នាំសិក្សា ២០២៤-២០២៥ សាលារៀន នៅទូទាំងប្រទេសសរុបមានប្រមាណ ១៩៥៩១ សាលា ដែលមានសិស្សានុសិស្សកំពុងសិក្សាប្រមាណ ៤ ១៧១ ៩៦២ នាក់ ។

ក្នុងចំណោមសាលារៀនជិត ២ម៉ឺនសាលា រាប់បញ្ចូលនូវសាលារៀនសាធារណៈមាន ១៣៩៤៨ សាលា សាលារៀនឯកជន ២២៩៥ សាលា និងមត្តេយ្យសិក្សាសហគមន៍ ៣៣៤៨ កន្លែង។ ចំណែកឯគ្រឹះស្ថានឧត្តមសិក្សាទូទាំងប្រទេសមាន ១៩៤ កន្លែង ក្នុងនោះ គ្រឹះស្ថានឧត្តមសិក្សាសាធារណៈ ៧៩ និងគ្រឹះស្ថានឧត្តមសិក្សាឯកជន ១១៥។

ក្នុងចំណោមសិស្សនិស្សិតជាង ៤លាននាក់​មានរាប់បញ្ចូលនូវចំនួនសិស្សដូចតទៅ កុមារតូចទទួលបានសេវាអប់រំគ្រប់រូបភាព ៤២៥ ៥៣៩ នាក់ សិស្សបឋមសិក្សាសរុប ២ ២៦១ ២១៦ នាក់ សិស្សមធ្យមសិក្សាបឋមភូមិសរុប ៧១២ ២៩៨ នាក់ សិស្សមធ្យមសិក្សាទុតិយភូមិសរុប ៤៥៦ ៨០៤ នាក់ និង សិស្សមធ្យមសិក្សាចំណេះទូទៅនិងបច្ចេកទេស ៣៨៤០ នាក់។ ចំណែកឯ និស្សិតឧត្តមសិក្សាសរុប ៣១៦ ១០៥ នាក់។​

គួរបញ្ជាក់ផងដែរថា ក្រៅពីការសិក្សានៅសាលារៀន នៅកម្ពុជាមានអ្នកសិក្សាដែលបានទទួលការអប់រំក្រៅប្រព័ន្ធតាមគ្រប់កម្មវិធីសរុប ៥០ ០៥៣ នាក់ ស្រី ៥២.៤% ក្នុងនោះ អ្នកចូលរៀនកម្មវិធីអក្ខរកម្មអប់រំក្រៅប្រព័ន្ធ ១៧ ៥៧៥នាក់ ស្រី ៦២.៣%៕