ក្រសួងអប់រំ អំពាវនាវការជួយឧបត្ថម្ភ និង លើកទឹកចិត្តបន្ថែម ដល់

ភ្នំពេញ៖ ក្រសួងអប់រំ នាថ្ងៃទី ២០ កុម្ភៈ ២០២៥ បានប្រកាសជូនដំណឹងជាសាធារណៈក្នុងការអំពាវនាវស្នើសូមការជួយឧបត្ថម្ភសម្រាប់ជារង្វាន់ និងការលើកទឹកចិត្តបន្ថែមដល់ជ័យលាភី សិស្សពូកែទូទាំងប្រទេស ផ្នែកអក្សរសិល្ប៍ខ្មែរ គណិតវិទ្យា និងរូបវិទ្យា។

ជារៀងរាល់ឆ្នាំក្រសួងអប់រំ តែងតែរៀបចំការប្រឡងជ្រើសរើសសិស្សពូកែទូទាំងប្រទេស ផ្នែកអក្សរសិល្ប៍ខ្មែរ គណិតវិទ្យា និងរូបវិទ្យា សម្រាប់សិស្សថ្នាក់ទី៩ និងថ្នាក់ទី១២។ យ៉ាងណាមិញ កាលពីថ្ងៃទី ២៧ មករា ២០២៥ កន្លងទៅនេះ ក្រសួងបានប្រកាសពីការផ្អាកការប្រឡងសិស្សពូកែទូទាំងប្រទេស ដែលនាំឱ្យសាធារណជនក្នុងបណ្តាញសង្គមបញ្ចេញមតិប្រតិកម្មជាច្រើនមិនពេញចិត្តនឹងការផ្អាកដោយមូលហេតុភាពចាំបាច់នៃក្រសួងអប់រំ។ ត្រឹមរយៈពេលខ្លីក្រោយរងការប្រតិកម្ម ក្រសួងអប់រំ នាពេលព្រឹកថ្ងៃទី ០៣ កុម្ភៈ ២០២៥ ប្រកាសរៀបចំការប្រឡង«ជ្រើសរើសសិស្សពូកែទូទាំងប្រទេស»ឡើងវិញ។

បើតាមសេចក្តីជូនដំណឹងនៃក្រសួងអប់រំ នាថ្ងៃទី ២០ កុម្ភៈ ២០២៥ នេះ បានឱ្យដឹងថា ក្រសួងអប់រំអំពាវនាវសារធារណជនក្នុងការជួយឧបត្ថម្ភសម្រាប់ជារង្វាន់ និងការលើកទឹកចិត្តបន្ថែមដល់ជ័យលាភី សិស្សពូកែទូទាំងប្រទេស ផ្នែកអក្សរសិល្ប៍ខ្មែរ គណិតវិទ្យា និងរូបវិទ្យា។ ការអំពាវនាវនេះត្រូវបានធ្វើឡើងក្នុងគោលបំណងលើកកម្ពស់គុណភាពអប់រំ តាមរយៈការអភិវឌ្ឍធនធានមនុស្ស ដែលមានចំណេះដឹង និង ជំនាញប្រកបដោយសមត្ថភាពខ្ពស់ សំដៅអភិវឌ្ឍសេដ្ឋកិច្ច ក៏ដូចជាកសាងសង្គមជាតិឱ្យបានរឹងមាំ។

ក្រសួងអប់រំ បានលើកឡើងថា ដើម្បីធ្វើឱ្យពិធីនេះកាន់តែអធិកអធម ក្រសួងសូមធ្វើការអំពាវនាវចំពោះ ចំពោះសាធារណជន ដើម្បីជួយឧបត្ថម្ភជាថវិកា ជាសម្ភារៈ សម្រាប់ជារង្វាន់ និងការលើកទឹកចិត្តបន្ថែមដល់ជ័យលាភីសិស្សពូកែ ទូទាំងប្រទេស និងគណៈកម្មការរៀបចំ សំដៅជំរុញចលនានេះឱ្យកាន់តែមានប្រសិទ្ធភាពខ្ពស់នៅឆ្នាំបន្តបន្ទាប់។ ជាពិសេស ក្រសួងអប់រំ បានលើកឡើងថា សប្បុរសជននឹងត្រូវបានអញ្ជើញឱ្យចូលរួមក្នុងពិធីបិទការប្រឡង ចែកវិញ្ញាបនបត្រ និងរង្វាន់ជ័យលាភី ដើម្បីទទួលលិខិតថ្លែងអំណរគុណរបស់ក្រសួងអប់រំ ផងដែរ។

យោងតាមសេចក្តីជូនដំណឹង សាធារណជនអាចផ្ញើឬប្រគល់ ថវិកា ឬ សម្ភារៈ មកលោក គឹម ថាច តាមរយៈលេខទូរស័ព្ទ ០១២ ៨៤៣ ៤៧៥ នៅនាយកដ្ឋានកិច្ចការប្រឡង ដែលមានទីតាំងស្ថិតនៅអគារលេខ ១៦៩ លើមហាវិថីព្រះនរោត្តម រាជធានីភ្នំពេញ។

គួរបញ្ជាក់ផងដែរថា នៅឆ្នាំ២០២៥នេះ «ការប្រឡងសិស្សពូកែទូទាំងប្រទេស» នឹងប្រព្រឹត្តទៅចាប់ពីថ្ងៃទី២២ ខែមេសា ឆ្នាំ២០២៥ នៅ វិទ្យាល័យ ជា ស៊ីម សន្ធរម៉ុក រាជធានីភ្នំពេញ។ ពិធីបើកការប្រឡង នឹងប្រព្រឹត្តទៅនាថ្ងៃទី២១ ខែមេសា ឆ្នាំ២០២៥ វេលា ចំណែកឯពិធីបិទការប្រឡង ចែកវិញ្ញាបនបត្រ និង រង្វាន់ជ័យលាភី នឹងប្រព្រឹត្តទៅនាថ្ងៃទី២៥ ខែមេសា ឆ្នាំ២០២៥ វេលាម៉ោង ១៤:០០នាទីរសៀល នៅទីតាំងដដែល៕

អត្ថបទទាក់ទង