Fulbright បើកទទួលពាក្យអាហារូបករណ៍ថ្នាក់អនុបណ្ឌិត និងបណ្ឌិត សិក្សានៅអាម៉េរិក

ភ្នំពេញ៖ ស្ថានទូតអាម៉េរិកប្រចាំកម្ពុជា បានប្រកាសពីកម្មវិធីអាហារូបករណ៍ Fulbright ដែលជាឱកាសល្អសម្រាប់បន្តការសិក្សាថ្នាក់អនុបណ្ឌិត និងបណ្ឌិត នៅសហរដ្ឋអាមេរិកដែលទទួលពាក្យរហូតដល់ថ្ងៃទី18 ខែឧសភា ឆ្នាំ 2025 វេលាម៉ោង 23:59 ។

បើតាមគេហទំព័រផ្លូវការនៃស្ថានទូតអាម៉េរិកប្រចាំកម្ពុជាបានឱ្យដឹងថា អាហារូបករណ៍នេះនឹងធ្វើការគ្របដណ្ដប់ទៅលើថ្លៃធ្វើដំណើរទៅវិញទៅមកពីមាតុប្រទេសរបស់សិស្សនិងសហរដ្ឋអាម៉េរិក ថ្លៃសិក្សា ចំណាយនៃការរស់នៅប្រចាំថ្ងៃកំពុងពេលសិក្សាផងដែរ។

អាហារូបករណ៍ត្រូវបានបើកទទួលពាក្យសិស្សនិស្សិតកម្ពុជាជារៀងរាល់ឆ្នាំដោយធ្វើការជ្រើសរើសសិស្សដែលមានការសិក្សាមានកម្រិតល្អដែលបានបញ្ចប់ការសិក្សាថ្នាក់បរិញ្ញាបត្ររួចរាល់ ថែមទាំងមានការប្រើប្រាស់ភាសាអង់គ្លេសបានប្រសើរ និងមានលក្ខខណ្ឌផ្សេងទៀតដូចខាងក្រោម។

លក្ខខណ្ឌចាំបាច់មួយចំនួនក្នុងការដាក់ពាក្យមានដូចជា៖

- ជាជនជាតិខ្មែរ

- មានប្រវត្តិការសិក្សាល្អ និង លិខិតបញ្ជាក់ការអប់រំ

- មានសញ្ញាបត្របរិញ្ញាបត្រសម្រាប់អ្នកដាក់ពាក្យថ្នាក់អនុបណ្ឌិត ឬសញ្ញាបត្រអនុបណ្ឌិតសម្រាប់អ្នកដាក់ពាក្យថ្នាក់បណ្ឌិត

- មានសមត្ថភាពប្រើប្រាស់ភាសាអង់គ្លេសល្អ (ពិន្ទុ TOEFL អប្បបរមា 570 ឬ តេស្តផ្សេងទៀតដែលមានកម្រិតស្មើ)

- មានសមត្ថភាពក្នុងការសម្របខ្លួនទៅនឹងការរស់នៅបរទេស

- មានសមត្ថភាពសិក្សាកម្មវិធីសិក្សា​កម្រិតខ្ពស់

- គ្មានប្រវត្តិក្នុងការរស់នៅ ឬសិក្សានៅសហរដ្ឋអាមេរិករយៈពេលយូរ

សម្រាប់សិស្សដែលមិនធ្លាប់មានការប្រឡង TOEFL កន្លងមកតម្រូវឱ្យធ្វើការប្រឡងធ្វើតេស្តឱ្យបានមុនពេលផុតកំណត់នៃការដាក់ពាក្យ ដោយសារតែដើម្បីអាចដាក់អាហារូបករណ៍នេះបានសិស្សត្រូវមានឯកសារមួយចំនួនរួចជាស្រេចដូចជា ការធ្វើតេស្តភាសាអង់គ្លេស ប្រតិបត្តិពិន្ទុ វិញ្ញាប័នបត្រដែលបញ្ជាក់ពីការបញ្ចប់ការសិក្សា និងការបំពេញទម្រង់បែបបទនៃការដាក់ពាក្យផងដែរ។

ប្រសិនបើមានចំណាប់អារម្មណ៍ សូមដាក់ពាក្យមុនថ្ងៃទី 18 ខែឧសភា ឆ្នាំ 2025 វេលាម៉ោង 23:59 (Eastern Time) តាមរយៈតំណភ្ជាប់ https://kh.usembassy.gov/fulbright-student-fellowship/ ។

កម្មវិធីអាហារូបករណ៍ Fulbright នឹងលើកកម្ពស់ឧត្តមភាពសិក្សា និងពង្រឹងទំនាក់ទំនងរវាងប្រជាជនកម្ពុជានិងសហរដ្ឋអាមេរិក ដោយលើកកម្ពស់ការយល់ដឹង និងកិច្ចសហការគ្នាទៅវិញទៅមក។ អាហារូបករណ៍ Fulbright ដើរតួនាទីយ៉ាងសំខាន់ក្នុងការជំរុញគោលដៅអភិវឌ្ឍប្រកបដោយចីរភាព និងកំណើនសេដ្ឋកិច្ចរបស់កម្ពុជា តាមរយៈការបណ្តុះបណ្តាលអ្នកដឹកនាំសម្រាប់ពេលអនាគតនូវចំណេះដឹង និងជំនាញសំខាន់ៗ ដើម្បីជំរុញការផ្លាស់ប្តូរជាវិជ្ជមាន ។

គួរបញ្ជាក់ផងដែរថាសម្រាប់ការដាក់ពាក្យ និងការប្រគល់ឯកសារត្រូវបានធ្វើឡើងតាមរយៈអនឡាញដែលសិស្សអាចចូលមើលព័ត៌មានលម្អិតនៅក្នុងគេហទំព័ររបស់ស្ថានទូតអង់គ្លេសប្រចាំប្រទេសកម្ពុជា kh.usembassy.gov ៕