លោកគ្រូ ទឹម ម៉ានី នឹងចែករំលែកបទពិសោធន៍រយៈពេល ៥២ ឆ្នាំក្នុង «អាជីពជាអ្នកនិពន្ធ» នៅថ្ងៃទី ១៥ កុម្ភៈ

ភ្នំពេញ៖ លោកគ្រូ ទឹម ម៉ានី ដែលបានប្រឡូកក្នុងអាជីពជាអ្នកនិពន្ធ៥២ឆ្នាំ នឹងចែករំលែកបទពិសោធន៍ពីភាពខុសគ្នារវាងបរិបទនៃការតាក់តែងនិពន្ធពីមុន និងបច្ចុប្បន្ន ក្នុងកម្មវិធីកកូរសៀវភៅ។

យោងតាមគេហទំព័រនៃ កកូរសៀវភៅ បានឱ្យដឹងថា នៅក្នុងកម្មវិធីចែករំលែកបទពិសោធន៍នេះ លោកគ្រូ ទឹម ម៉ានី ដែលជាអ្នកនិពន្ធប្រលោមលោកជើងចាស់មួយរូប នឹងចែករំលែកពី បញ្ហាដែលលោកបានចួបប្រទះរយៈពេលកន្លងមកក្នុងអាជីពជាអ្នកនិពន្ធ និងភាពខុសគ្នារវាងបរិបទនៃការតាក់តែងនិពន្ធពីមុន និងបច្ចុប្បន្ន។

បើតាមគេហទំព័រក្រុមការងារកកូរសៀវភៅ បានបញ្ជាក់ផងដែរថា ក្នុងរយៈពេល ៥២ ឆ្នាំមកនេះ​ លោកគ្រូ ទឹម ម៉ានី និពន្ធប្រលោមលោកបាន ៣១៦ ចំណងជើង ដែលបានចេញផ្សាយនៅលើទីផ្សារ និង ២១ រឿងទៀត នៅមិនទាន់ចេញផ្សាយនោះទេ។ ក្រៅពីអាជីពនិពន្ធ​ លោកគ្រូ បានចំណាយពេលបង្រៀន ច្បាប់រដ្ឋបាលសាធារណៈ ភាពជាអ្នកដឹកនាំ បង្រៀនការតាក់តែងនិពន្ធប្រលោមលោក និងអត្ថបទភាពយន្ត។

កម្មវិធីនេះត្រូវបានរៀបចំឡើងដោយកកូរសៀវភៅ និង សហការរៀបចំដោយ វិទ្យាស្ថានបារាំង ដែលនឹងប្រព្រឹត្តទៅនៅថ្ងៃទី ១៥ កុម្ភៈ ឆ្នាំ២០២៥ វេលាម៉ោង ១:៣០ រសៀល ដល់ ៤:០០ រសៀល នៅទីតាំង បណ្ណាល័យពហុឯកសារជាន់ទី១ នៃវិទ្យាស្ថានបារាំង ដែលអនុញ្ញាតឱ្យសាធារណជនចូលរួមដោយសេរី។

គួរបញ្ជាក់ផងដែរថា កកូរសៀវភៅ ជាគម្រោងមួយដែលត្រូវបានផ្តួចផ្តើមដោយអ្នកនិពន្ធ គឹម ឌីណា ដែលមានការសហការរៀបចំដោយយុវជនដែលមានឆន្ទៈក្នុងការអាន និងការតែងនិពន្ធ ដែលមានបេសកកម្មក្នុងការបង្កើតឱ្យមានការជួបជុំរវាងអ្នកអាននិងអ្នកអាន ព្រមទាំងផ្សាភ្ជាប់អ្នកអានជាមួយនឹងអ្នកនិពន្ធផងដែរ។ កម្មវិធីនេះ ជាលើកទី១៣ហើយ ដែល កកូរសៀវភៅ បានរៀបចំឡើង៕