លោក ឆេង សុភ័ក្រ្ត នឹងចូលរួមកម្មវិធីជាវាគ្មិននៅ «ពិព័រណ៍បច្ចេកវិទ្យា IMI Show»ដ៏ធំ នៅប្រទេសថៃ

ភ្នំពេញ៖ លោក ឆេង សុភ័ក្រ្ត ដែលត្រូវបានសាធារណជនភាគច្រើន ស្គាល់ថា «រៀនថត» ត្រូវបានអញ្ជើញចូលរួមពិព័រណ៍បច្ចេកវិទ្យាដ៏ធំមួយនៅប្រទេសថៃ នៅថ្ងៃទី ៦ ដល់ ថ្ងៃទី ៩ មីនា ឆ្នាំ២០២៥ ។

បើតាមគេហទំព័រហ្វេសប៊ុកនៃលោក ឆេង សុភ័ក្រ្ត បានឱ្យដឹងថា លោកនឹងចូលរួមក្នុងនាមជាវាគ្មិនមួយរូបដែលនឹងចែករំលែកក្រោមប្រធានបទ ការកើនឡើងមាតិកាឌីជីថលនៅក្នុងប្រទេសកម្ពុជា ( The rise of digital content in Cambodia)។

បើតាមខ្លឹមសារដែលភ្ជាប់ជាមួយនឹងរូបភាព លោក បានលើកឡើងថា «ខ្ញុំនឹងចែករំលែកអំពីការងារដែលពួកយើងបានធ្វើមកជាង ១០ឆ្នាំនេះ។ គោលដៅធំគឺ​​ ទាក់ទាញក្រុមហ៊ុនធំៗ មកបើកទីផ្សារក្នុងស្រុក នឹងងាកមកមើល អ្នកផលិតមាតិកាក្នុងប្រទេសយើង»។

យោងតាមគេហទំព័រនៃ IMI Show 2025 បានឱ្យដឹងថា កម្មវិធីនេះនឹងមានការចូលរួមដាក់តាំងពិព័រណ៍ពីស្ថាប័នធំៗមកពីទូទាំងពិភពលោក ដែលដាក់បង្ហាញនូវបច្ចេកវិទ្យារូបភាព​និងចលនា ។ IMI SHOW 2025 គឺជាកម្មវិធីមួយដែលលើសពីការតាំងពិព័រណ៍ពាណិជ្ជកម្មធម្មតា ប៉ុន្តែវាគឺជាវេទិកាដែលភ្ជាប់មនុស្សនៅក្នុងវិស័យនេះ ដែលអាចបង្កើតឱកាសអាជីវកម្ម និង​ជំរុញ​វិស័យថតរូប និង​វីដេអូ​ថៃ​ឱ្យ​ឈាន​ដល់​កម្រិត​អន្តរជាតិ។ កម្មវិធីនេះនឹងបង្ហាញពីការច្នៃប្រឌិតក្នុងវិស័យសំខាន់ៗចំនួនបីគឺ បច្ចេកវិទ្យាថតរូបភាព ការច្នៃប្រឌិតវីដេអូ និងបច្ចេកវិទ្យាទំនើប។

គួរបញ្ជាក់ផងដែរថា កម្មវិធី IMI Show 2025 (Image Motion Innovation of Thailand) នឹងប្រព្រឹត្តទៅនាថ្ងៃទី ៦ ដល់ ថ្ងៃទី ៩ មីនា ឆ្នាំ២០២៥ នៅទីក្រុងបាំងកក នៃប្រទេសថៃ ដែលមានសកម្មភាពជាច្រើនដូចជា ការចែករំលែកពីវាគ្មិនកិត្តិយស ការតាំងពិព័រណ៍ ព្រមទាំង​ការបង្កើតទំនាក់ទំនងជាមួយនឹងភ្នាក់ងារពាក់ព័ន្ធផងដែរ៕