ហ្វីលីពីន៖ ក្នុងសេចក្តីថ្លែងការណ៍រួមរវាងសម្តេច ហ៊ុន ម៉ាណែត នាយករដ្ឋមន្ត្រីនៃកម្ពុជានិង លោក Ferdinand R. Marcos Jr.ប្រធានាធិបតី នៃសាធារណរដ្ឋហ្វីលីពីន បានផ្តោតសំខាន់ក្នុងការបង្កើនកិច្ចសហប្រតិបត្តិការឱ្យកាន់តែស៊ីជម្រៅលើកិច្ចការងារ សេដ្ឋកិច្ច និងការវិនិយោគ។
ផ្តើមដំបូងពីលោក Marcos បានថ្លែងរាយការណ៍ពីកិច្ចពិភាក្សាគ្នារវាង លោក និង សម្តេច ហ៊ុន ម៉ាណែត អំពីវិធីដើម្បីបង្កើនកិច្ចសហប្រតិបត្តិការកម្ពុជា និងហ្វីលីពីន ស្វែងរកឱកាសថ្មីៗ ដើម្បីពង្រឹងទំនាក់ទំនងទ្វេភាគីឱ្យកាន់តែស៊ីជម្រៅ លើវិស័យពាណិជ្ជកម្ម និង វិនិយោគ។សម្រាប់លោក Marcos ស្វាគមន៍កិច្ចសហប្រតិបត្តិការជាផ្លូវការ ស្តីពីការជៀសវាងការយកពន្ធទ្វេដង និង ការផ្លាស់ប្តូរការអនុវត្តល្អបំផុតក្នុងច្បាប់ប្រកួតប្រជែង ដែលហ្វីលីពីន និងកម្ពុជាទាំងពីរចាត់ទុកថា មានសារៈសំខាន់ក្នុងការទាក់ទាញ និង សម្របសម្រួលដល់ការវិនិយោគទ្វេភាគី និង សកម្មភាពសេដ្ឋកិច្ចរវាងវិស័យធុរកិច្ច។
បើតាមលោក Marcos ប្រទេសហ្វីលីពីន មើលឃើញកម្ពុជាជាដៃគូដ៏សំខាន់ក្នុងការធានាសន្តិសុខស្បៀងអាហារ ហើយលោករីករាយឈានដល់កិច្ចព្រមព្រៀងមួយ ដើម្បីបន្តកិច្ចសហប្រតិបត្តិការកាន់តែខ្លាំងក្នុង វិស័យកសិកម្ម និង វិស័យកសិកម្ម។
ចំណែក សម្តេច ហ៊ុន ម៉ាណែត បានថ្លែងពីការចូលរួមរបស់កម្ពុជាឈររួចរាល់ជាស្រេចក្នុងការរួមចំណែកក្នុងការធានាសន្តិសុខស្បៀងអាហាររបស់ហ្វីលីពីន តាមរយៈ ការនាំចេញអង្ករ និង អាហារផ្សេងទៀតទៅហ្វីលីពីន។ក្នុងនាមមេដឹកនាំកម្ពុជា សម្តេច បានធានាថា កម្ពុជាលើកទឹកចិត្តខ្លាំងលើការពាណិជ្ជកម្ម វិនិយោគ ធុរកិច្ច។
ជារួមក្នុងសេចក្តីថ្លែងការណ៍រួមនេះ មេដឹកនាំកម្ពុជា-ហ្វីលីពីន គឺបានផ្តោតសំខាន់លើការងារការទូតសេដ្ឋកិច្ច ក្នុងក្របខ័ណ្ឌទ្វេភាគីលើវិស័យសំខាន់ៗជាច្រើន រួមមាន វិស័យពាណិជ្ជកម្ម, វិនិយោគ, ធុរកិច្ច, ការពារជាតិ និងសន្តិសុខ, កសិកម្ម, សុខាភិបាល, វប្បធម៌, អប់រំ, ការបណ្ដុះបណ្ដាលជំនាញវិជ្ជាជីវៈ,បច្ចេកវិទ្យា និង ការជំរុញការតភ្ជាប់ប្រជាជន និងប្រជាជននៃប្រទេសទាំងពីរ៕
