តួត្លុក មុំវណ្ណ ដាវីន និង រិទ្ធ ដារ៉ូ នឹងរៀបចំកម្មវិធី «ជួបជុំអ្នកគាំទ្រ និងការដឹងគុណ» នៅថ្ងៃទី ១៥ កុម្ភៈ

ភ្នំពេញ៖ តួត្លុក រិទ្ធ ដារ៉ូ និង មុំវណ្ណ ដាវីន ដែលជាយុវជនកំពុងសិក្សានៅសាកលវិទ្យាល័យភូមិន្ទវិចិត្រសិល្បៈ នឹងរៀបចំកម្មវិធី «ជួបជុំអ្នកគាំទ្រ និងការដឹងគុណ» នៅថ្ងៃទី ១៥ កុម្ភៈ ២០២៥ ដែលមានការសម្តែងទស្សនីយភាពចម្រុះ និងការសម្តែងជាច្រើនផ្សេងទៀតសម្រាប់អ្នកចូលរួម។

បើតាមយុវជន មុំវណ្ណ ដាវីន ត្រូវបានសាធារណជនតាមដានក្នុងបណ្តាញសង្គមស្គាល់តាមរយៈ ការសម្តែងជា «ទេវតាក្ងេងក្ងង់» បានឱ្យដឹងថា ដាវីន និង ដារ៉ូ បានសហការគ្នាយ៉ាងសកម្មជាមួយនឹងមិត្តរួមក្រុមរបស់ខ្លួន ដើម្បីបង្កើតនូវកម្មវិធីជួបជុំអ្នកគាំទ្រ ដែលស្រឡាញ់ពេញចិត្តនូវការសម្តែងរបស់ខ្លួន ដែលផ្សារភ្ជាប់នឹងសិល្បៈ ព្រមទាំងចំណេះដឹងដែលយុវជនក្រុមនេះបានទទួលពីការបង្ហាត់បង្រៀននៅក្នុងសាលា។

យុវជន មុំវណ្ណ ដាវីន បានថ្លែងប្រាប់ស៊ីស៊ីថាមស៍ ថា ជំនួបអ្នកគាំទ្រនេះនឹងមានសកម្មភាពជាច្រើនដូចជា ការសម្តែងរបាំ និងចម្រៀង ការសម្តែងហោមរោងយីកេ ការសម្តែងទស្សនីយភាពចម្រុះ ការទស្សនាវីដេអូ ជីវប្រវត្តិនៃតួត្លុក ដារ៉ូ និង ដាវីន ជាពិសេស គឺមានកម្មវិធីដឹងគុណ ។

យោងតាមបទសម្ភាសរបស់យុវជនទាំងពីរជាមួយនឹងស៊ីស៊ីថាមស៍ បានឱ្យដឹងបន្តទៀតថា យុវជនទាំងពីររូប ជាអតីតសិស្សបានបញ្ចប់ការសិក្សា នៅសាលាវិចិត្រសិល្បៈតាំងពីកុមារភាព។

យុវជន រិទ្ធ ដារ៉ូ ត្រូវបានជីដូនរបស់ខ្លួនផ្ញើនៅនឹងគ្រូបង្រៀនស្នាក់នៅអន្តវេសិកដ្ឋាន និងរៀនសូត្រនៅទីនោះតាំងពីវ័យកុមារមកម្ល៉េះ ហើយបន្តខិតខំគ្រប់វិធីសាស្រ្តដើម្បីអាចមានលទ្ធភាពបន្តការសិក្សានៅសាកលវិទ្យាល័យ ដារ៉ូបានចំណាយពេលធ្វើការគ្រប់បែបយ៉ាងរយៈពេល ៥ឆ្នាំ ដើម្បីសន្សំប្រាក់គ្រប់។ ក្រោយបានចូលរៀននៅសាកលវិទ្យាល័យភូមិន្ទវិចិត្រសិល្បៈតាមក្តីស្រមៃ ដារ៉ូ បានជួបជាមួយនឹង យុវជន មុំវណ្ណ ដាវីន ដែលជាមិត្តរួមថ្នាក់នៅសាកលវិទ្យាល័យ បានចាប់ដៃគ្នាសម្តែងរឿងជាច្រើនជាតួត្លុក រហូតបានមានប្រជាប្រិយភាពខ្លាំងមកដល់ពេលបច្ចុប្បន្នជាពិសេសក្នុងសំណាក់យុវជន។

ចំណែកឯ យុវជន មុំវណ្ណ ដាវីន ជាយុវជនមួយរូបដែលចាប់ផ្តើមមានក្តីស្រឡាញ់លើវិស័យសិល្បៈក្រោយបានចូលរួមកម្មវិធីប្រកួតនានាពាក់ព័ន្ធនឹងសិល្បៈកាលពីកុមារភាព ដោយមានការតម្រង់ទិសពីក្រុមគ្រួសារ។ គួរបញ្ជាក់ផងដែរថា យុវជន ដាវីន មានសែស្រឡាយជាអ្នកសិល្បៈដែលត្រូវជាមីងរបស់ខ្លួន ដែលកាន់តែជម្រុញឱ្យយុវជនរូបនេះ មានការស្រឡាញ់វិស័យនេះថែមមួយកម្រិតទៀត។

កម្មវិធីជំនួបអ្នកគាំទ្រ និងការដឹងគុណនេះ នឹងប្រព្រឹត្តទៅនាថ្ងៃទី ១៥ កុម្ភៈ ឆ្នាំ២០២៥ វេលាម៉ោង ៥ ល្ងាច រហូតដល់ម៉ោង ៧:៣០ល្ងាច នៅទីតាំងរោងភាពយន្ត Legensd 271 by Ize ក្នុងផ្សារទំនើបជីបម៉ុង២៧១ ជាន់ទី៣ ។ សាធារណជនអាចចុះឈ្មោះចូលរួមដោយសេរីតាមរយៈតំណភ្ជាប់ https://bookme.plus/t/events/tuatluk-fanmeeting ដែល បានបង្ហោះនៅក្នុងបណ្តាញសង្គមរបស់តួត្លុកទាំងពីរ ។

គួរបញ្ជាក់ផងដែរថា ដាវីន និង ដារ៉ូ ជាដៃគូសម្តែងរឿងជាច្រើនជាតួត្លុក ដែលកំពុងទាក់ទាញអារម្មណ៍សាធារណជនគាំទ្រនូវសិល្បៈវប្បធម៌ខ្មែរ ដោយយុវជនទាំងពីររូបមានសមត្ថភាព និងទេពកោសល្យពីកំណើត បូកផ្សំនឹងការបង្ហាត់បង្រៀនដោយលោកគ្រូអ្នកគ្រូ ហើយបច្ចុប្បន្ន យុវជនទាំងពីរជានិស្សិតដែលកំពុងបន្តការសិក្សានៅសាកលវិទ្យាល័យភូមិន្ទវិចិត្រសិល្បៈ៕