យុវជនមួយក្រុមបង្កើតកម្មវិធី«ជិះស៊ីក្លូ»​ដើម្បីគាំទ្រដល់អ្នកបើកស៊ីក្លូ

ភ្នំពេញ៖ យុវជនមួយក្រុម បង្កើតគម្រោងដែលមានឈ្មោះថា «ជិះស៊ីក្លូ» មានបេសកកម្មដើម្បីបង្កើតអនុស្សាវរីយ៍ដល់អ្នកចូលរួម តាមរយៈការផ្សារភ្ជាប់អ្នកចូលរួមទៅនឹងវប្បធម៌របស់ទីក្រុងភ្នំពេញ និងគាំទ្រដល់អ្នកបើកស៊ីក្លូក្នុងស្រុក ដែលនឹងប្រព្រឹត្តទៅនៅថ្ងៃទី ២៦ មករា ២០២៥ វេលាម៉ោង ១​ ដល់ ៥:៣០ ល្ងាច។

បើតាមគេហទំព័រ JisCyclo-ជិះស៊ីក្លូ គម្រោង «ជិះស៊ីក្លូ» ជាគម្រោងមួយដែលបង្កើតឡើងដើម្បីផ្តល់បទពិសោធន៍ដល់អ្នកចូលរួមដោយការជិះស៊ីក្លូជុំវិញទីតាំងសំខាន់ៗនៅក្នុងរាជធានីភ្នំពេញ និងជួយដល់អ្នកបើកស៊ីក្លូតាមរយៈការលក់សំបុត្រ ការបរិច្ចាគ និងជំនួយសហគមន៍។

យោងតាមគេហទំព័រ JisCyclo-ជិះស៊ីក្លូ បានឱ្យដឹងថា ក្រុមការងាររៀបចំគម្រោងមានដូចជា កញ្ញា សុខ លីលីន កញ្ញា សុខ ពណ៌ជូ កញ្ញា ខូវ ម៉ីម៉ី កញ្ញា ឡុង ហ្សានីតា និងកញ្ញា ង៉ែត​ សៀកយ៉េង កញ្ញា សំ ដេលី ព្រមទាំងយុវជនស្ម័គ្រចិត្តជាច្រើននាក់ដែលត្រូវបានជ្រើសរើសកាលពីថ្មីៗនេះ នៅថ្ងៃទី ២៨ ធ្នូ​២០២៤ ដោយក្រុមការងារសហស្ថាបនិកផងដែរ។

កាលពីថ្ងៃទី ០៤ មករា ២០២៥ ក្រុមការងារបានចាប់ផ្តើមបើកលក់សំបុត្រជាផ្លូវការ ដែលមានតម្លៃ​ សម្រាប់អ្នកដែលទិញត្រឹមថ្ងៃ ០៦ មករា នឹងមានតម្លៃត្រឹមតែ ៣៥០០០ រៀល តែប្រសិនបើទិញធម្មតានាពេលក្រោយ មានតម្លៃ ៤០០០០ រៀល ។ ក្នុងសំបុត្រមានផ្តល់ជូនដូចជា ដំណើរទស្សនកិច្ចក្នុងបរមរាជវាំង , ការមានសកម្មភាពកម្សាន្ត ការផ្តល់អាហារសម្រន់ និងភេសជ្ជៈ ព្រមទាំង មានផ្តល់ជូនជាវិញ្ញាបនបត្រនៃការចូលរួមផងដែរ។

ដំណើរទស្សនកិច្ចនឹងប្រព្រឹត្តទៅនៅថ្ងៃទី ២៦ មករា ២០២៥ វេលាម៉ោង ១​ ដល់ ៥:៣០ ល្ងាច។ ប្រសិនបើមានចំណាប់អារម្មណ៍ក្នុងការចូលរួមចំណែកនៅក្នុងសកម្មភាពមួយនេះ សូមចុះឈ្មោះតាមរយៈតំណភ្ជាប់ https://shorturl.at/lJCcA ។

គួរបញ្ជាក់ផងដែរថា គម្រោង «ជិះស៊ីក្លូ» មានបេសកកម្មដើម្បីបង្កើតអនុស្សាវរីយ៍ដល់អ្នកចូលរួម តាមរយៈការផ្សារភ្ជាប់អ្នកចូលរួមទៅនឹងវប្បធម៌របស់ទីក្រុងភ្នំពេញ និងគាំទ្រដល់អ្នកបើកស៊ីក្លូក្នុងស្រុក៕