ភ្នំពេញ៖ ក្រសួងអប់រំ ប្រកាសការប្រកួតការតែងនិពន្ធប្រលោមលោកខ្នាតខ្លី ដើម្បីចូលរួមអបអរសាទរទិវាជាតិអំណានលើកទី១០ ដែលនឹងប្រព្រឹត្តទៅនៅថ្ងៃអង្គារ ទី១១ ខែមីនា ឆ្នាំ២០២៥ ។
បើតាមក្រសួងអប់រំ បានឱ្យដឹងថា ដើម្បីចូលរួមអបអរសាទរទិវាជាតិអំណានលើកទី១០ ដែលនឹងប្រព្រឹត្តទៅនៅថ្ងៃអង្គារ ទី១១ ខែមីនា ឆ្នាំ២០២៥ ក្រសួងមានការប្រកួតការតែងនិពន្ធប្រលោមលោកខ្នាតខ្លី ដើម្បីលើកកម្ពស់តម្លៃពលរដ្ឋខ្មែរនិង វប្បធម៌ជាតិខ្មែរ ។
ការប្រកួតប្រជែងតែងនិពន្ធប្រលោមលោកខ្នាតខ្លី ជ្រើសរើសជ័យលាភី ចំនួន ៣រូប ដោយស្នាដៃតែងនិពន្ធឈរលើមូលបទ៖
១-តម្លៃសីលធម៌
២-តម្លៃប្រពៃណីទំនៀមទម្លាប់ និងប្រវត្តិសាស្ត្រខ្មែរ
៣-តម្លៃភាសា អក្សរសាស្ត្រខ្មែរ វប្បធម៌ និងអរិយធម៌ខ្មែរ។
ក្នុងនោះផងដែរ ក្រសួងអប់រំ បានបញ្ជាក់ពីលក្ខខណ្ឌនៃការជ្រើសរើសដូចខាងក្រោម៖
១- សមាសភាពដែលអាចចូលរួមប្រឡងប្រជែងមានដូចជា មន្ត្រីអប់រំ គ្រូបង្រៀន គរុនិស្សិត គរុសិស្ស សិស្ស និស្សិត និងសាធារណជនទូទៅ។
២- បេក្ខជនត្រូវតាក់តែងជារឿងខ្លីពាក្យរាយ ឬ ជាពាក្យកាព ចំនួនពី១០ទំព័រ ទៅ១៥ទំព័រ ខ្នាតក្រដាស A4 ដោយកុំព្យូទ័រ ប្រើពុម្ពអក្សរ Khmer OS Moul light 12 (សម្រាប់ចំណងជើង និងចំណងជើងរង) និង Khmer OS Battambang ទំហំអក្សរ ១២ (សម្រាប់អត្ថបទ)។
៣-ជាស្នាដៃតែងនិពន្ធថ្មីសុទ្ធសាធ ដោយមិនមែនជាអត្ថបទកែសម្រួល ឆ្នៃប្រឌិត ឬលួចចម្លង ឬក៏មិន មែនជាស្នាដៃដែលធ្លាប់ទទួលជ័យលាភី ក្នុងការប្រកួតប្រជែងនានាកន្លងមកហើយដែរ ។
៤- ខ្លឹមសារឬអត្ថន័យ នៃរឿង ត្រូវឆ្លុះបញ្ចាំងទៅលើមូលបទ ដោយមិនមានបង្កប់លាយឡំនឹងសារ នយោបាយអវិជ្ជមាន ដែលធ្វើឱ្យប៉ះពាល់ដល់ជាតិ សាសនា និងព្រះមហាក្សត្រឡើយ ។
៥-សំណេរត្រូវគោរពតាមគោលការណ៍សំណេរអក្ខរាវិរុទ្ធក្នុងវចនានុក្រមខ្មែរ បោះពុម្ពដោយពុទ្ធសាសន បណ្ឌិត្យគ្រាទី៥ ឆ្នាំ១៩៦៧។ ចំពោះពាក្យបច្ចេកទេសមួយចំនួន និងពាក្យថ្មីៗ ដែលមិនមានក្នុងវចនានុក្រមខ្មែរ ឆ្នាំ១៩៦៧នេះ អាចប្រើតាមវចនានុក្រមថ្មីរបស់ក្រុមប្រឹក្សាជាតិភាសាខ្មែរ ឆ្នាំ២០២២ និងឯកសារគតិយុត្តមួយ ចំនួនទៀត ដែលក្រសួងអប់រំ យុជន និងកីឡា បានអនុម័តឱ្យប្រើប្រាស់ជាធរមាន។
គួរបញ្ជាក់ផងដែរថា ការប្រកួតនេះ នឹងផុតកំណត់ទទួលពាក្យ៖ថ្ងៃទី១៥ ខែកុម្ភៈ ឆ្នាំ២០២៥ វេលាម៉ោង ១៧:០០នាទី។ ក្នុងករណី មានចម្ងល់បន្ថែម សូមទាក់ទងទៅកាន់លលេខទូរស័ព្ទ ០១០ ២២ ០៧ ៨៨៕