អាកាសចរណ៍ធំបំផុតទី២របស់កូរ៉េខាងត្បូង ចាប់ផ្តើមហោះហើរត្រង់មកកម្ពុជាជាផ្លូវការឡើងវិញ

ភ្នំពេញ៖ ក្រុមហ៊ុនអាកាសចរណ៍ Asiana Airlines ធំបំផុតទី២របស់ប្រទេសកូរ៉េខាងត្បូង នឹងចាប់ផ្តើមហោះហើរត្រង់មកកាន់អាកាសយានដ្ឋានអន្ដរជាតិសៀមរាប-អង្គរ ខេត្ដសៀមរាប ចាប់ពីថ្ងៃទី២៥ ខែធ្នូ ឆ្នាំ២០២៤ បន្ទាប់ពីបានអាក់ខានដោយសារវិបត្ដិជំងឺកូវីដ-១៩។

ក្រុមហ៊ុនអាកាសចរណ៍ Asiana Airlines នឹងចាប់ផ្តើមហោះត្រង់ចេញពីអាកាសយានដ្ឋានអន្ដរជាតិ អ៊ីឈុន នៃទីក្រុងសេអ៊ូល មកកាន់អាកាសយានដ្ឋានអន្ដរជាតិសៀមរាប-អង្គរ នៃខេត្តសៀមរាប ដោយមានចំនួន ៧ជើងក្នុងមួយសប្តាហ៍ ជារៀងរាល់ថ្ងៃ ដែលប្រើប្រាស់យន្តហោះសេរីថ្មី Airbus A321 Neo ជាមួយអ្នកដំណើរជិត ២០០នាក់ ដោយប្រើរយះពេលហោះហើរ ៥ម៉ោង និង ៥០នាទី។

គួរបញ្ជាក់ថា គិតមកដល់ខែធ្នូ ឆ្នាំ២០២៤នេះ ជាមធ្យមមានជើងហោះហើរមកដល់ និងត្រឡប់ទៅវិញ មានចំនួន ៥២ជើងក្នុងមួយថ្ងៃ និងគិតជាមធ្យមមានភ្ញៀវធ្វើដំណើរតាមយន្ដហោះ ទាំងមកដល់ និងត្រឡប់ទៅវិញ ៥.០០០នាក់ក្នុងមួយថ្ងៃ៕