ឱកាសសម្រាប់សិស្សកម្ពុជា អាយុ ១៦-១៨ ឆ្នាំ ចំនួន ៥រូប សិក្សាថ្នាក់វិទ្យាល័យនៅក្រៅប្រទេស

ភ្នំពេញ៖ UWC ផ្តល់អាហារូបករណ៍សម្រាប់សិស្សដែលមានអាយុចន្លោះ ១៦ ទៅ ១៨ ឆ្នាំ សិក្សាថ្នាក់វិទ្យាល័យនៅក្រៅប្រទេសដូចជា ជប៉ុន ចិន សហរដ្ឋអាម៉េរិក ថៃ ឬ ឥណ្ឌា ចាប់ទទួលពាក្យ ពីថ្ងៃទី ១ ខែធ្នូ ឆ្នាំ ២០២៤ ដល់ ថ្ងៃទី៣១ ខែធ្នូ ឆ្នាំ ២០២៤។

បើតាមគេហទំព័រនៃ UWC ប្រចាំកម្ពុជា បានឱ្យដឹងថា កម្រិតនៃជំនួយខាងហិរញ្ញវត្ថុ សម្រាប់កន្លែងសិក្សានីមួយៗរបស់សិស្សនឹងត្រូវបានកំណត់នៅពេលក្រោយ។ សាលាអាចនឹងជួយឧបត្ថម្ភពេញនូវថ្លៃសិក្សា ថ្លៃស្នាក់នៅ ថ្លៃចុះឈ្មោះពេលប្រលងបាក់ឌុបអន្តរជាតិ និងថ្លៃធ្វើដំណើរចុះកម្មវិធីសិក្សាផ្សេងៗ ដោយអាស្រ័យទៅលើ ការវាយតំលៃហិរញ្ញវត្ថុ និងជីវភាពនៃគ្រួសាររបស់សិស្ស។ ប្រសិនបើត្រូវបានជាប់ សិស្សដែលទទួលជ័យលាភីនឹងចាប់ផ្តើមចូលរៀន ក្នុងកំឡុងខែសីហា និង ខែកញ្ញា ឆ្នាំ២០២៥ ខាងមុខនេះ។

អាហារូបករណ៍ United World College (UWC) គឺផ្តល់ជូនសម្រាប់សិស្សដែលមានអាយុចន្លោះ ១៦ ទៅ ១៨ ឆ្នាំ សិក្សាថ្នាក់វិទ្យាល័យនៅក្រៅប្រទេសដូចជា ជប៉ុន ចិន សហរដ្ឋអាម៉េរិក ថៃ ឬ ឥណ្ឌា ចាប់ទទួលពាក្យ ពីថ្ងៃទី ១ ខែធ្នូ ឆ្នាំ ២០២៤ ដល់ ថ្ងៃទី៣១ ខែធ្នូ ឆ្នាំ ២០២៤

លក្ខខណ្ឌចាំបាច់ដែលសិស្សត្រូវមានដើម្បីអាចដាក់ពាក្យបានមានដូចតទៅ៖

- បេក្ខជនត្រូវមានសញ្ជាតិកម្ពុជា

- បេក្ខជនត្រូវមានថ្ងៃកំណើតក្នុងចន្លោះ ថ្ងៃទី ១ ខែមករា ឆ្នាំ ២០០៧ ដល់ ថ្ងៃទី ៣១ ខែ សីហា ឆ្នាំ ២០០៩

- បេក្ខជនបច្ចុប្បន្នកំពុងសិក្សាថ្នាក់ទី ១១ និង ១២ នៅវិទ្យាល័យក្នុងប្រទេសកម្ពុជា

- បេក្ខជនមានអាស័យដ្ឋានអុីមែលផ្ទាល់ខ្លួនមួយ ដែលមានសុពលភាព

ក្រៅពីមានគ្រប់លក្ខខណ្ឌខាងលើ សិស្សត្រូវមានលក្ខណៈសម្បត្តិចាំបាច់ដូចខាងក្រោម៖

- បេក្ខជនមានលក្ខណៈសម្បត្តិសាកសមនឹងគុណតម្លៃ និង បេសកកម្ម នៃ UWC

- បេក្ខជនត្រូវមានជំនាញសរសេរ និង និយាយ ជាភាសាអង់គ្លេសអោយបានគ្រប់គ្រាន់

- បេក្ខជនបង្ហាញនូវសមត្ថភាពនៃការចេះត្រិះរិះពិចារណា និង សក្តានុពលក្នុងការសិក្សា

- បេក្ខជនបង្ហាញនូវចំណាប់អារម្មណ៍លើសកម្មភាពក្រៅកម្មវិធីសិក្សាផ្សេងៗ ក៏ដូចជា ឥទ្ធិពលវិជ្ជមានទៅលើសង្គម

- នៅមានពេលដែលខ្លួនទទួលបានមូលនិធិសម្រាប់ការអប់រំ មួយនេះ

ដំណើរការនៃការដាក់ពាក្យ គឺសិស្សដែលមានលក្ខណះសម្បត្តិគ្រប់គ្រាន់តាមល័ក្ខខ័ណ្ឌខាងលើ អាចដាក់ពាក្យតាមអនឡាញ ដោយឥតគិតថ្លៃតាមដំណាក់កាលខាងក្រោម៖

- ជំហានទី១៖ ចូលទៅក្នុងគេហទំព័រនេះ https://bit.ly/uwc-cambodia-2yrs-apply-2025-2027

- ជំហានទី២៖ បំពេញចម្លើយលើគ្រប់សំនួរទាំងអស់ ហើយបន្ទាប់មក ចុចលើពាក្យ "Submit". សូមបញ្ជាក់ថា ការដាក់ពាក្យនេះក៏ត្រូវបានរាប់បញ្ចូលជាចំណែក ក្នុងការវាយតម្លៃជ្រើសរើស បេក្ខជនចូលទៅវគ្គសម្ភាសន៍។ ដូចនេះសូមសរសេរចម្លើយឲ្យបានក្បោះក្បាយ។

- ជំហានទី៣៖ អ្នកនឹងទទួលបានសារជូនដំណឹងពីការដាក់ពាក្យ ក្នុងប្រអប់សាររបស់អ្នក ប្រសិនបើ អ្នកប្រើអាស័យដ្ឋានអុីមែលដែលមានសុពលភាព និងពិតជាបានបញ្ចប់នូវការបំពេញពាក្យរបស់អ្នក។ សូមចូលមើលក្នុងប្រអប់សារ spam/junk ប្រសិនបើអ្នកមិនទទួលបាន សារជូនដំណឹងក្នុងប្រអប់សារគោល។ លុះត្រាតែអ្នកទទួលបានអុីម៉ែលបញ្ជាក់ពីអុីមែលស្វ័យប្រវត្តិពី Google Form ទើបអាចបញ្ជាក់ថា អ្នកពិតជាបានដាក់ពាក្យដោយជោគជ័យ។

គួរបញ្ជាក់ផងដែរថា UWC (United World College) គឺជាចលនាសកលមួយដែលយកការអប់រំជាកម្លាំងក្នុងការរួបរួម មនុស្ស ជាតិសាសន៍ និងវប្បធម៌ ដើម្បីសន្តិភាព និងអនាគតដែលមានចីរភាព។ UWC ផ្តល់នូវការអប់រំថ្នាក់វិទ្យាល័យអន្តរជាតិ ដោយផ្តោតសំខាន់លើការយល់ដឹងអន្តរជាតិ និងការចែករំលែកវប្បធម៍ រវាងសិស្សនិងសិស្ស។ ដោយមានទីតាំងនៅ ១៨ប្រទេស ស្ថិតលើ៤ទ្វីប វិទ្យាល័យ UWC ផ្តល់ជូននូវការអប់រំដែល មានភាពប្រកួតប្រជែង និងជម្រុញអោយមានការផ្លាស់ប្តូរដល់សិស្សជាង ៩៥០០ នាក់ ជារៀងរាល់ឆ្នាំ៕