.png?1741682398)
ភ្នំពេញ៖ ប្រមុខរាជរដ្ឋាភិបាលកម្ពុជា សម្តេច ហ៊ុន ម៉ាណែត នៅថ្ងៃទី ២ ធ្នូនេះ បានប្រកាសផ្តល់ ផ្លូវកៅស៊ូមួយខ្សែប្រវែង ៨គីឡូវម៉ែត្រ និង សម្ភារប្រើប្រាស់មួយចំនួនទៀត ដល់ សហគមន៍ទេសចរណ៍ធម្មជាតិកំពង់ភ្លុក នៅស្រុកប្រាសាទបាគង ខេត្តសៀមរាប។ការប្រកាសនេះ គឺធ្វើឡើងក្រោយពីចុះមកពិនិត្យស្ថានភាព និង ទស្សនាសហគមន៍ទេសចរណ៍ធម្មជាតិកំពង់ភ្លុក។
បន្ទាប់ពីបានចូលរួមកម្មវិធីរត់ប្រណាំងអន្តរជាតិពាក់កណ្ដាលម៉ារ៉ាតុងអង្គរវត្តលើកទី ២៩ សម្តេច ហ៊ុន ម៉ាណែត បានចុះមកពិនិត្យស្ថានភាព និង ទស្សនាសហគមន៍ទេសចរណ៍ធម្មជាតិកំពង់ភ្លុក ស្រុកប្រាសាទបាគង ខេត្តសៀមរាប។ក្នុងទស្សនកិច្ចនោះជួបសំណេះសំណាលផ្ទាល់ជាមួយសហគមន៍ ពិសេសអ្នកប្រកបរបរជាអ្នកបើកបរកាណូត និងអុំទូកបម្រើសេវាជូនអ្នកទេសចរ។
បើតាមសម្តេចនាយករដ្ឋមន្ត្រី ក្នុងជំនួបនោះសម្តេចទទួលបាននូវសំណូមពរមួយចំនួន ហើយសម្រេចផ្តល់ជាដំណោះស្រាយជូនប្រជាពលរដ្ឋដោយសម្តេចបានប្រកាសផ្តល់ផ្លូវកៅស៊ូ ៨គីឡូម៉ែត្រ លើផ្លូវក្រាលគ្រួសក្រហមដែលមានស្រាប់ ដើម្បីផ្តល់ភាពងាយស្រួលក្នុងការធ្វើដំណើរ និង កាត់បន្ថយការហុយ។ ទី២.កសាងបញ្ជរលក់សំបុត្រថ្មីរបស់សហគមន៍ ដែលនឹងជួយអោយសហគមន៍មិនចាំបាច់ជួលដី ដើម្បីលក់សំបុត្រដូចបច្ចុប្បន និង ទី៣.ផ្តល់បន្ថែមនូវធុងសំរាមក្នុងសហគមន៍ ដើម្បីថែរក្សាអនាម័យ និងបរិស្ថាន នៅក្នុងតំបន់។
គួរបញ្ជាក់ថា សហគមន៍ទេសចរណ៍ធម្មជាតិ កំពង់ភ្លុក គឺជាតំបន់ទេសចរណ៍ធម្មជាតិមួយកន្លែងដែលមានចម្ងាយប្រមាណ ៣២គីឡូម៉ែត្រពីក្រុងសៀមរាប។ភ្ញៀវទេសចរ ជិះទូក កាណូត ទស្សនាកំសាន្ត និង ផ្តិតយកទេសភាពគួរជាទីគយគន់នៃសម្រស់ធម្មជាតិព្រៃលិចទឹក និងទន្លេសាប ដ៏ធំល្វឹងល្វើយ ហើយភ្ញៀវទេសចរនឹងទទួលបានការយល់ដឹងពីការរស់នៅ នៅក្នុងសហគមន៍កំពង់ភ្លុកនេះ៕
.png?1744178821)
