ទូត៤ទស្សនកិច្ច«អាកាសយានដ្ឋានអន្តរជាតិតេជោ»ខណៈបច្ចុប្បន្នសម្រេចសាងសង់ជាង៩០%

កណ្តាល៖ ឯកអគ្គរាជទូត និង រដ្ឋទូត ប្រទេសចំនួន៤ បានធ្វើដំណើរទស្សកិច្ច«អាកាសយានដ្ឋានអន្តរជាតិតេជោ» លំដាប់ថ្នាក់ 4F របស់កម្ពុជា ដើម្បីសិក្សាស្វែងយល់ពីដំណើរការសាងសង់ ខណៈដែលអាកាសយានដ្ឋានអន្តរជាតិដ៏ធំរបស់កម្ពុជាមួយនេះ សម្រេចការសាងសង់បានប្រមាណជាង៩០ភាគ និង ត្រៀមបើកដំណើរការឆមាសទី១ ឆ្នាំ២០២៥ខាងមុននេះ។

ឯកអគ្គរដ្ឋទូត រាជទូត ទាំង៤ប្រទេសនោះ រួមមាន៖ ឯកអគ្គរដ្ឋទូតឥណ្ឌូនេស៉ីប្រចាំនៅកម្ពុជា, ឯកអគ្គរាជទូតអង់គ្លេសប្រចាំនៅកម្ពុជា,ឯកអគ្គរាជទូតម៉ាឡេស៊ីប្រចាំនៅកម្ពុជា និង ឯកអគ្គរាជទូតប្រុយណេប្រចាំនៅកម្ពុជា។ក្រុមមន្ត្រីទូតទាំង៤នោះបាន ទស្សនកិច្ចនៅទីតាំងសំខាន់ៗជាច្រើន នៅអាកាសយានដ្ឋានអន្តរជាតិតេជោ ជាមួយការបង្ហាញភាពភ្ញាក់ផ្អើល ដោយមិននឹកស្មានថា កម្ពុជា មានការសាងសងព្រលានយន្ដហោះខ្នាត 4F ជាអន្ដរជាតិ និង មានស្ដង់ដារខ្ពស់​ ​បែបនេះនោះទេ។

ក្នុងជំនួបពិភាក្សាជាមួយក្រុមហ៊ុនសាងសង់ ឯកអគ្គរដ្ឋទូតទាំង៤ប្រទេស បានសន្យាថា នឹងព្យាយាម ជួយផ្សព្វផ្សាយអំពីប្រទេសកម្ពុជា ដែលមានព្រលានយន្ដហោះខ្នាត 4F ជាអន្ដរជាតិ ទៅកាន់ប្រជាជនរបស់ពួកគេ ក្នុងការទាក់ទាញភ្ញៀវទេសចរ នៅថ្ងៃខាងមុខ។

ក្នុងដំណើរទស្សនកិច្ចនោះ លោកឯកញ៉ា ឆារស៍ វ៉ាន់ នាយកគ្រប់គ្រង នៃក្រុមហ៊ុន ខេមបូឌា អ៊ែរផត អ៊ិនវេសមិន ឯ.ក (CAIC) បានបញ្ជាក់ថា គិតត្រឹម​ថ្ងៃ​​ទី ២៨ ខែវិច្ឆិកានេះ ព្រលានយន្តហោះអន្តរជាតិតេជោ សម្រេច​ការ​សាងសង់​បានប្រហែលជា ៩២% និង ចំនួនទឹកប្រាក់ ១,៣៣៦ លានដុល្លារ ហើយគ្រោងនឹងបើកដំណើរការ នៅឆ្នាំ២០២៥ ទៅតាមផែនការ ដែលបានគ្រោងទុក។

សូមបញ្ជាក់ថា អាកាសយានដ្ឋានអន្តរជាតិតេជោ ជាអាកាសយានដ្ឋានលំដាប់ 4F របស់កម្ពុជា សាងសង់លើផ្ទៃដីសរុប ២,៦០០ហិកតា ស្ថិតនៅចម្ងាយ ១៩ គីឡូម៉ែត្រ ពីរាជធានីភ្នំពេញ។គេរំពឹងថា ក្រោយបើកដំណើរការ អាកាសយានដ្ឋាន អាចស្រូបយក និង ទទួលបានការហោះហើរពីឆ្ងាយឆ្លងទ្វីប ដែលអាចឲ្យប្រភេទយន្តហោះធុនយក្ស រហូតដល់ Airbus A380-800 និង យន្តហោះ Boeing 747-800 ចុះចតបាន៕