រុស្ស៊ីចាត់ទុកអាម៉េរិកកំពុងតែដុត«ភ្លើងសង្រ្គាម»កាន់តែធំ

រុស្ស៊ី៖ វិមានក្រឹមឡាំងបានចាត់ទុកការសម្រេចចិត្តរបស់លោកចូបៃដិនក្នុងការបើកភ្លើងខៀវឲ្យអ៊ុយក្រែនវាយចូលជ្រៅដោយប្រើមីស៊ីលផលិតដោយអាម៉េរិកគឺជាការដុតភ្លើងសង្រ្គាមកាន់តែធំនៅទូទាំងសកលលោក។ សេចក្តីប្រកាសរបស់វិមានក្រឹមឡាំងរបស់រុស្ស៊ីធ្វើឡើងមួយថ្ងៃក្រោយពីរដ្ឋបាលលោកបៃដិនប្រកាសអនុញ្ញាតឲ្យអ៊ុយក្រែនប្រើមីស៊ីលផលិតដោយអាម៉េរិកវាយចូលជ្រៅក្នុងដែនដីនៃប្រទេសរុស្ស៊ី។

បើតាមអ្នកនាំពាក្យវិមានក្រឹមឡាំងលោក Dmitry Peskov បានចាត់ទុកសហរដ្ឋអាម៉េរិកកំពុងតែបន្តបញ្ឆេះភ្លើង និងបង្កឱ្យមានភាពតានតឹងកាន់តែខ្លាំងឡើងដោយមិនអាចរកពេលបញ្ចប់បាន លោកក៏បានព្រមានថារុស្ស៊ីនឹងឆ្លើយតបទៅនឹងការសម្រេចចិត្តរបស់អាម៉េរិកក្នុងការអនុញ្ញាតឱ្យអ៊ុយក្រែនប្រើប្រាស់មីស៊ីលរយៈចម្ងាយឆ្ងាយវាយចូលដែនដីរបស់រុស្ស៊ី។

ចំណែកលោកបៃដិនបានថ្លែងនៅក្នុងកិច្ចប្រជុំកំពូល G20 នៅប្រទេសប្រេស៊ីលដោយលោកជំរុញឱ្យមេដឹកនាំបណ្តាលប្រទេសផ្សេងទៀតគាំទ្រអធិបតេយ្យភាពរបស់អ៊ុយក្រែន និងបន្តផ្តល់ជំនួយបន្ថែមដល់ភាគីអ៊ុយក្រែន។ លោក Biden បានប្រាប់អង្គប្រជុំថាសហរដ្ឋអាម៉េរិកគាំទ្រយ៉ាងខ្លាំងចំពោះអធិបតេយ្យភាព និងបូរណភាពទឹកដីរបស់អ៊ុយក្រែន៕