ភ្នំពេញ៖ កម្លាំងសមត្ថកិច្ចចម្រុះជាង១ម៉ឺន៦ពាន់នាក់ នឹងត្រូវបានពង្រាយតាមទីតាំងកម្សាន្តសំខាន់ៗក្នុងរាជធានីភ្នំពេញកំឡុងពេលពិធីបុណ្យអុំទូករយះពេល ៣ថ្ងៃ ដើម្បីរក្សាបាននូវសន្តិសុខ សណ្ដាប់ធ្នាប់ សុវត្ថិភាពជូនដល់ប្រជាពលរដ្ឋ។
កម្លាំងសមត្ថកិច្ចចម្រុះជាង១ម៉ឺន៦ពាន់នាក់ ត្រៀមដាក់ពង្រាយការពារនៅតំបន់ទីតាំងកម្សាន្តសំខាន់ៗក្នុងរាជធានីភ្នំពេញកំឡុងពេលពិធីបុណ្យអុំទូករយះពេល ៣ថ្ងៃ ចាប់ពីថ្ងៃទី១៤ ដល់ថ្ងៃទី១៦ខែវិច្ឆិកា ឆ្នាំ២០២៤ ដើម្បីរក្សាការពារ សន្ដិសុខ របៀបរៀបរយ សណ្ដាប់ធ្នាប់ ចរាចរណ៍ សង្គ្រោះទូកលិចនិងអ្នកជំងឺ ដើម្បីឲ្យការប្រារព្វពិធីដំណើរការទៅដោយរលូន និងរក្សាការសប្បាយរីករាយដល់ភ្ញៀវជាតិ និងអន្តរជាតិ។
គួរបញ្ជាក់ថា កងកម្លាំងសរុបទាំងជាង១ម៉ឺន៦នាក់ មកពី១៦ស្ថាប័ន/អង្គភាព រួមមានអគ្គស្នងការដ្ឋាននគរបាលជាតិ, បញ្ជាការដ្ឋានកងរាជអាវុធហត្ថ, បញ្ជាការដ្ឋានអង្គរក្ស, បញ្ជាការដ្ឋានជាតិកម្លាំងពិសេសប្រឆាំងភេរវកម្ម, បញ្ជាការដ្ឋានកងទ័ពជើងទឹក, យោធភូមិភាគពិសេស, ក្រសួងសុខាភិបាល, គណៈបញ្ជាការឯកភាពរដ្ឋបាលរាជធានីភ្នំពេញ, ការិយាល័យទី២ នៃកងទ័ពជើងគោក, អគ្គិសនីកម្ពុជា, ក្រុមបច្ចេកទេសរុករកជាតិផ្ទុះកែច្នៃ, អាជ្ញាធរជាតិអាវុធគីមី ជីវសាស្ដ្រ វិទ្យុសកម្ម នុយក្លេអ៊ែរ, គណៈកម្មាធិការជាតិប្រឆាំងភេរវកម្ម, អគ្គនាយកដ្ឋានស្រាវជ្រាវចារកិច្ច, ក្រសួងប្រៃសណីយ៍ និងទូរគមនាគមន៍ និងភ្នាក់ងារសន្ដិសុខឯកជន៕
