ភ្នំពេញ៖ ក្នុងរយៈពេល ១៥ថ្ងៃ គិតចាប់ពីថ្ងៃទី១ រហូតដល់ថ្ងៃទី១៥ ខែកញ្ញា ឆ្នាំ២០២៤ សមត្ថកិច្ចនគរបាលជាតិ នៃក្រសួងមហាផ្ទៃ បានបង្ក្រាបល្បែងស៊ីសងប្រមាណ ២០ទីតាំង ដោយកើតមាននៅរាជធានី-ខេត្ត ចំនួន១២ប៉ុណ្ណោះ។ នេះបើតាមលោក ទូច សុឃៈ អ្នកនាំពាក្យរងក្រសួងមហាផ្ទៃ។
បើតាមលោក ទូច សុឃៈ បានឲ្យដឹងថា ការបង្រ្កាបល្បែងសុីសងទាំង ១២រាជធានី-ខេត្តនោះ រួមមាន ខេត្តកំពង់ធំ ខេត្តឧត្តរមានជ័យមាន ខេត្តកំពត ខេត្តកណ្តាល ខេត្តត្បូងឃ្មុំ ខេត្តបាត់តំបង ខេត្តក្រចេះ ខេត្តសៀមរាប ខេត្តពោធិ៍សាត់ និងរាជធានីភ្នំពេញ ដោយសមត្ថកិច្ចបានបញ្ជូនខ្លួនជនសង្ស័យមួយចំនួនទៅកាន់តុលាការ និងមួយចំនួនទៀត ទទួលការអនុវត្តវិធានការរដ្ឋបាលដោយការអប់រំ ណែនាំ និងធ្វើកិច្ចសន្យាបញ្ឈប់សកម្មភាព។
លោកបញ្ជាក់បន្ថែមថា អាជ្ញាធរ និងសមត្ថកិច្ចប្រតិបត្តិការបង្ក្រាបល្បែងស៊ីសងតាមនីតិវិធី និងច្បាប់កំណត់ដោយស្មារតីទទួលខុសត្រូវ បានធ្វើឱ្យការប្រព្រឹត្តិរបស់ប្រជាពលរដ្ឋមានការថយចុះគួរឱ្យកត់សម្គាល់។
សូមបញ្ជាក់ថា មុខសញ្ញាល្បែងស៊ីសង ជាការងារអាទិភាពក្នុងចំណោមទិសដៅអាទិភាពទាំង៦ ដែលលោក ស សុខា ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ បានដឹកនាំបញ្ជាឱ្យអាជ្ញាធរគ្រប់មូលដ្ឋាន រួមទាំងនគរបាលជាតិ យកចិត្តទុកដាក់អនុវត្ត ចាប់តាំងពីដើមនីតិកាលទី៧ នៃរដ្ឋសភា ក្រោមការដឹកនាំរបស់សម្ដេច ហ៊ុន ម៉ាណែត នាយករដ្ឋមន្រ្តី នៃកម្ពុជា៕
