ភ្នំពេញ៖ កម្ពុជា និងចិន ចាត់ទុកគ្រូបង្រៀនជនជាតិចិន នៅក្នុងប្រទេសកម្ពុជាដើរតួនាទីដ៏សំខាន់ ក្នុងទំនាក់ទំនង រវាងប្រទេសទាំងពីរ ជំរុញការកសាងសហគមវាសនារួម។ នេះបើតាមប្រសាសន៍ លោក អ៊ុម រម្យណី រដ្ឋលេខាធិការក្រសួងអប់រំ យុវជន និងកីឡា នៅក្នុងពិធីអបអរសាទរទិវាគ្រូបង្រៀនចិន នៅស្ថានទូតចិនប្រចាំកម្ពុជា នាថ្ងៃទី១០ ខែកញ្ញា ឆ្នាំ២០២៤ ។
លោក អ៊ុម រម្យណី រដ្ឋលេខាធិការក្រសួងអប់រំ យុវជន និងកីឡា មានប្រសាសន៍ថា កម្ពុជា និងចិន បានជំរុញការផ្លាស់ប្តូរប្រជាជន និងវប្បធម៌ មានប្រវត្ថិសាស្ត្រដ៏យូលង់មកហើយ។ ជាពិសេសប៉ុន្មានចុងក្រោយនេះ ភាគីចិនបានចូលរួមចំណែកយ៉ាងសំខាន់ ក្នុងការអភិវឌ្ឍន៍សង្គមសេដ្ឋកិច្ចកម្ពុជា តាមរយៈការសាងសង់ហេដ្ឋារចនាសម្ព័ន្ធ គ្រូបង្រៀនជនជាតិចិននៅកម្ពុជា គឺជានិម្មិតសញ្ញានៃការផ្លាស់ប្តូរទំនាក់ទំនងកាន់តែរឹងមាំ។
លោក អ៊ុម រម្យណី បានបន្ថែមទៀតថា គ្រូជនជាតិចិនដើរតួនាទីយ៉ាងសំខាន់ក្នុងការជំរុញកិច្ចសហប្រតិបត្តិការរវាងប្រទេសទាំងពីរ ដោយពួកគេបាននាំមកនូវការអប់រំប្រកបដោយគុណភាព ចំណេះដឹងជ្រាលជ្រៅបង្ហាត់បង្រៀននៅកម្ពុជា ហើយបានជាស្ពានផ្សារភ្ជាប់វប្បធម៌ប្រទេសទាំងពីរ ជំរុញការស្គាល់ពីគ្នាកាន់តែច្បាស់រវាងប្រជាជាតិទាំងពីរ។
ជាមួយគ្នានោះ លោក Wang Wenbin ឯកអគ្គរដ្ឋទូតចិនប្រចាំកម្ពុជា បានមានប្រសាសន៍ថា វិស័យមូលធនមនុស្សគឺត្រូវបានរាជរដ្ឋាភិបាលកម្ពុជាយកចិត្តទុកដាក់យ៉ាងខ្លាំង។ វត្តមានរបស់គ្រូបង្រៀនចិននៅកម្ពុជា បានចូលរួមចំណែកអភិវឌ្ឍន៍មូលធនមនុស្ស ដោយមានសិស្សានុសិស្សខ្មែរកាន់តែច្រើន រៀនភាសាចិន ដែលនេះជាការអភិវឌ្ឍទំនាក់ទំនងមិត្តភាពរវាងប្រទេសទាំងពីរ កាន់តែល្អប្រសើរ។
លោក Wang Wenbin បានបញ្ជាក់ថា ចាប់តាំងពីឆ្នាំ២០០៩មក រដ្ឋាភិបាលចិនបានបញ្ជូនគ្រូបង្រៀនមក កម្ពុជា រាប់ពាន់នាក់ ហើយនៅឆ្នាំ២០២៤នេះ មានចំនួនជាង៣០០នាក់បន្ថែមទៀត។ លោកសង្ឃឹមថា គ្រូបង្រៀនចិននឹងខិតខំបំពេញការងារ ចូលរួមជំរុញការកសាងសហគមវាសនារួម ហើយស្ថានទូតចិនថ្លែងអំណរគុណ និងប្តេជ្ញាគំាទ្រពេញទំហឹងចំពោះកិច្ចការងារនេះ។
គួរបញ្ជាក់ថា ពិធីអបអរសាទរទិវាគ្រូបង្រៀនចិន នាពេលនោះ ក៏មានវត្តមានចូលរួមពីតំណាងសកលវិទ្យាល័យ ដែលមានបង្រៀនភាសាចិន គ្រូបង្រៀនទាំងខ្មែរ និងចិន ព្រមទាំង ភ្ញៀវកិត្តិយសជាច្រើនរូបផ្សេងទៀតផងដែរ៕
.png?1725941256)
