បារាំង៖ លោក វណ្ណដា កំពូលតារារ៉េបខ្មែរ បានបង្ហាញខ្លួនលើឆាកកម្មវិធីបិទកីឡាអូឡាំពិករដូវក្តៅ ក្រុងប៉ារីស ឆ្នាំ២០២៤ ដោយច្រៀងបទចម្រៀង Time to Rise។
កំពូលតារាចម្រៀងរ៉េប វណ្ណដា ដែលល្បីខ្លាំងប៉ុន្មានឆ្នាំចុងក្រោយនេះ គ្មាននរណាមិនស្គាល់នោះទេ ព្រោះលោកមិនត្រឹមតែល្បីល្បាញនៅក្នុងស្រទាប់យុវវ័យប៉ុណ្ណោះទេ តែកេរ្តិ៍ឈ្មោះរបស់លោកបានសាយភាយក្លិនក្រអូបចេញទៅដល់ឆាកអន្តរជាតិថែមទៀតផង ពិសេសប្រទេសក្នុងតំបន់អាស៊ាន និងប្រទេសភូមិផងរបងជាប់គ្នា។
ហើយកាលពីថ្មីៗនេះ កំពូលតារាចម្រៀងរ៉េប ដែលមានដើមកំណើតនៅខេត្តព្រះសីហនុរូបនេះ បានបង្ហាញខ្លួនលើឆាកកម្មវិធីបិទកីឡាអូឡាំពិករដូវក្តៅ ក្រុងប៉ារីស ឆ្នាំ២០២៤ ដោយច្រៀងបទចម្រៀង Time to Rise។
សូមជម្រាបថា បទ «Time To Rise» ជាចម្រៀងហ៊ីបហប ដែលមានដាក់បញ្ចូលតន្ត្រីបុរាណ។ នេះជាគំនិតច្នៃប្រឌិតថ្មីបំផុតមិនធ្លាប់មានពីមុនមក។ ការបកស្រាយរួមគ្នារវាង វណ្ណដា និង ព្រឹទ្ធាចារ្យចាប៉ីដងវែង គង់ ណៃ ធ្វើឱ្យបទនេះកាន់តែមានរសជាតិប្លែកសម្រាប់អ្នកស្តាប់។ រសជាតិថ្មីរវាងតន្ត្រីបុរាណ និងចង្វាក់ហ៊ីបហបសម័យទំនើបដែល វណ្ណដា ដាក់បញ្ចូលគ្នា មិនត្រឹមអន្ទងចិត្តអ្នកស្តាប់ក្នុងស្រុក តែបទនេះល្បីរន្ទឺដល់ឆាកអន្តរជាតិ រហូតពិភពលោកងាកមកសម្លឹងមើលសិល្បករវ័យក្មេង វណ្ណដា និងសមត្ថភាពដ៏អស្ចារ្យរបស់លោក៕
