ប៉េកាំង៖ អគ្គិភ័យមួយបានឆាបឆេះមជ្ឈមណ្ឌលលក់ទំនិញមួយកន្លែងនៅភាគនិរតីនៃប្រទេសចិន បានសម្លាប់មនុស្ស ១៦ នាក់ ។ប្រតិបត្តិការជួយសង្គ្រោះបានបញ្ចប់នៅម៉ោងប្រហែល ៣ ទៀបភ្លឺកាលពីថ្ងៃព្រហស្បតិ៍ នេះបើយោងតាមសេវាពន្លត់អគ្គីភ័យ និងសង្គ្រោះក្នុងតំបន់ដែលដកស្រង់ដោយទីភ្នាក់ងារសារព័ត៌មានរដ្ឋ Xinhua បានចេញផ្សាយ ។
កិច្ចខិតខំប្រឹងប្រែងជួយសង្គ្រោះកំពុងបន្ត។ ភ្លាមៗនោះ គេនៅមិនទាន់ដឹងថា បណ្តាលមកពីមូលហេតុអ្វី បណ្តាលឲ្យមានអគ្គិភ័យឆាបឆេះនៅក្នុងអគារនៅឡើយនោះទេ អគារនេះមានហាងលក់ទំនិញ ការិយាល័យ ភោជនីយដ្ឋាន និងរោងកុន។
វីដេអូដែលចាក់ផ្សាយដោយប្រព័ន្ធផ្សព្វផ្សាយរដ្ឋ CCTV និងចែករំលែកនៅលើប្រព័ន្ធផ្សព្វផ្សាយសង្គមកាលពីយប់ថ្ងៃពុធបានបង្ហាញផ្សែងខ្មៅយ៉ាងក្រាស់ហុយចេញពីអាគារ១៤ ជាន់ក្នុងទីក្រុង Zigong ខេត្ត Sichuan ។ មនុស្សប្រមាណជាង ៣០នាក់ត្រូវបានជួយសង្គ្រោះពីអគារដែលបានឆាបឆេះនេះ ដោយភ្លើងបានពន្លត់ដោយក្រុមអ្នកជួយសង្គ្រោះនៅម៉ោង ៨ យប់ថ្ងៃពុធ៕
