【វីដេអូ】និស្សិតខ្មែរ៣រូបបង្កើត«គម្រោងព្រលានយន្តហោះ»ដោយបង្ហាញរចនាបថខ្មែរ

ភ្នំពេញ៖យោងតាមការបង្ហោះតាមបណ្តាញសង្គមហ្វេសប៊ុករបស់យុវជនមួយរូបមានឈ្មោះថា Ly Heang Kao ដែលបានធ្វើឱ្យមានការគាំទ្រ និងការកោតសរសើរជាខ្លាំងពីសាធារណជនជាច្រើន ចំពោះនិស្សិតខ្មែរទាំងបីរូបនោះ ដែលពួកគាត់ជាក្រុមនិស្សិតសិក្សាជំនាញស្ថាបត្យកម្មនៃសាកលវិទ្យាល័យភូមិន្ទវិចិត្រសិល្បៈ ដែលក្នុងវីដេអូនៃគម្រោងនោះ បានបង្ហាញទសណីយភាព និងដំណើរការដ៏គួរឱ្យកោតសរសើរទៅលើរចនាបថស្រស់ស្អាតប្រកបដោយភាពច្នៃប្រឌិត បង្កប់ដោយលក្ខណៈភូមិសាស្រ្ត និង លក្ខណៈខ្មែរ មិនធ្លាប់មានពីមុនមក គម្រោងអាកាសយាន្តដ្ឋានកម្ពុជាសម្រាប់ឆ្នាំ ២០៥០ (#Krongkampucheaairport2050) និងមានលក្ខណៈទំនើបប្លែក សាកសមតាមសម័យបច្ចេកវិទ្យានាពេលបច្ចុប្បន្ន ។

សូមបញ្ជាក់ថា តាមការរៀបរាប់របស់ម្ចាស់ហ្វេសប៊ុកដែលជាសហស្ថានិកម្នាក់ក្នុងចំណោមទាំងបីរូបគឺលោក កៅ លីហ៊ាង បានសរសេររៀបរាប់ត្រួសៗពី « ប្រធានបទនៃគម្រោងសារណាបញ្ចប់ថ្នាក់ឧត្តមសិក្សារបស់ក្រុមនិស្សិតខាងលើមានឈ្មោះថា “អាកាសយាន្តដ្ឋានអន្តរជាតិក្រុង កម្ពុជា” ដោយមានការចូលរួមពីនិស្សិតចំនួនបីរូបគឺនិស្សិត កៅ លីហ៊ាង និស្សិត ខៀវ គឹមហុង និងនិស្សិត ណា ស៊ីដាវីត ហើយដឹកនាំដោយសាស្រ្តចារ្យ ឆ័យ ការណូ អៀម សុគន្ធ និង សាស្រ្តាចារ្យសុត វ៉ាន់ថា ដោយចំណាយរយះពេលសិក្សាពេញមួយឆ្នាំ ដើម្បីបញ្ចប់គម្រោងសារណានៃមុខវិជ្ជាសិក្សារបស់ខ្លួន»៕