វៀតណាម៖ វៀតណាមបានប្រកាសនឹងអនុម័តច្បាប់ថ្មីដែលតម្រូវឲ្យគ្រប់ម៉ូតូទាំងអស់ត្រូវតែពិនិត្យបំពង់ស៊ីមាំង រឺ (ការបំភាយឧស្ម័នចេញពីម៉ូតូលើសកម្រិត) ម៉ូតូត្រូវឆ្លងកាត់ការធ្វើតេស្តបំភាយឧស្ម័ននៅមណ្ឌលត្រួតពិនិត្យយានយន្ត ច្បាប់ស្តីពីសណ្តាប់ធ្នាប់ និងសុវត្ថិភាពចរាចរណ៍ផ្លូវគោក នឹងចូលជាធរមាននៅថ្ងៃទី ១ ខែមករា ឆ្នាំ ២០២៥ ពេលបញ្ចប់ការធ្វើតេស្តវៀតណាមនឹងចេញវិញ្ញាបនបត្រឱ្យម្ចាស់ម៉ូតូ។
ភ្ជាប់ជាមួយនៃការអនុម័តច្បាប់ថ្មីនេះកាសែតវៀតណាមបានលើកឧទាហរណ៍នៃកោះតៃវ៉ាន់ ដែលជាទីផ្សារម៉ូតូឈានមុខគេនៅអាស៊ី បានអនុវត្តបទប្បញ្ញត្តិនេះអស់រយៈពេលជិត ៣០ ឆ្នាំមកហើយ។ តៃវ៉ាន់កំណត់ថាម៉ូតូត្រូវឆ្លងកាត់ការធ្វើតេស្តការបំភាយឧស្ម័នប្រចាំឆ្នាំបន្ទាប់ពីការផលិតរយៈពេល៥ឆ្នាំដំបូង។ ប្រសិនបើការធ្វើតេស្តធម្មតាមិនត្រូវបានធ្វើឡើងដោយម្ចាស់ម៉ូតូ ការផាកពិន័យចំពោះការមិនគោរពតាមគឺ ១៥ ដុល្លារអាម៉េរិក។ ប្រសិនបើម្ចាស់មិនបានទទួលការត្រួតពិនិត្យបន្ទាប់ពីប្រាំមួយខែ ការចុះបញ្ជីយានយន្តរបស់ពួកគេអាចត្រូវបានដកហូត។ការធ្វើតេស្តជាញឹកញាប់អាចត្រូវបានធ្វើឡើងដោយមិនគិតថ្លៃនៅហាងលក់ម៉ូតូធម្មតា ជាមួយនឹងឧបករណ៍ដែលផ្តល់ដោយទីភ្នាក់ងារដែលមានការអនុញ្ញាត។
ចំណែកនៅក្នុងប្រទេសឥណ្ឌូនេស៊ី មានតែរដ្ឋធានីហ្សាកាតាប៉ុណ្ណោះដែលតម្រូវឱ្យម៉ូតូឆ្លងកាត់ការធ្វើតេស្តបំភាយឧស្ម័នប្រចាំឆ្នាំបន្ទាប់ពីបីឆ្នាំដំបូង។ ការធ្វើតេស្តនីមួយៗមានតម្លៃប្រហែល ២.៥ ដុល្លារ។
បច្ចុប្បន្នប្រទេសវៀតណាមមានម៉ូតូចុះបញ្ជីប្រមាណ ៧០ លានគ្រឿង ដោយមានជាង ៤៥ លានគ្រឿងត្រូវបានប្រើប្រាស់យ៉ាងសកម្មជារៀងរាល់ថ្ងៃ។ ទន្ទឹមនឹងរថយន្ត ម៉ូតូគឺជាប្រភពដ៏សំខាន់មួយនៃការបំភាយឧស្ម័នកាបូនិក។ ការលក់ម៉ូតូថ្មីប្រចាំឆ្នាំនៅវៀតណាមក្នុងរយៈពេលប៉ុន្មានឆ្នាំចុងក្រោយនេះមានជាមធ្យមជិត ២,៨ លានគ្រឿង។តួលេខនេះរាប់បញ្ចូលទាំងការលក់ពីក្រុមហ៊ុនផលិតម៉ូតូក្នុងស្រុកធំៗចំនួនប្រាំ ដែលជាផ្នែកនៃសមាគមក្រុមហ៊ុនផលិតម៉ូតូវៀតណាម (VAMM)៖ Honda, Yamaha, Suzuki, SYM និង Piaggio៕
