ភ្នំពេញ៖ សិស្សកម្ពុជាចំនួន ៤៩នាក់ ត្រូវបានជ្រើសរើសជាតំណាងកម្ពុជា ក្នុងការចូលរួមប្រកួតសូត្រកំណាព្យភាសាចិនជាសាកលលើកទី៧។ នៅក្នុងនោះ យុវជនកម្ពុជា ៧នាក់ ទទួលបានជ័យលាភីនៅវគ្គប្រកួតផ្តាច់ព្រ័ត្រ ក្នុងចំណោមបេក្ខជន ៤២០០០នាក់ មកពី ១៤៤សាលាទូទាំងសកលលោក។
កម្មវិធីប្រកួតសូត្រកំណាព្យភាសាចិនជាសាកលលើកទី៧ ត្រូវបានបង្កើតឡើងដោយវិទ្យាស្ថានអប់រំមូលដ្ឋានគ្រឹះភាសាចិន នៃប្រទេចិន ដោយក្នុងឆ្នាំ ២០២៤នេះ មានបេក្ខជនចុះឈ្មោះប្រកួតប្រជែងសរុបប្រមាណ ៤២០០០នាក់ មកពី ១៤៤សាលាទូទាំងសកលលោក ដែលក្នុងនោះ កម្ពុជាមានសិស្សប្រមាណ ៧០០នាក់ មកពី ១៣សាលា បានចូលរួមប្រកួត ហើយសិស្សដែលត្រូវបានជ្រើសរើសជាតំណាងកម្ពុជាមានចំនួន ៤៩នាក់ និងមានសិស្សកម្ពុជាចំនួន ៧នាក់ ទទួលបានជ័យលាភីនៅវគ្គប្រកួតផ្តាច់ព្រ័ត្រ។
នៅក្នុងពិធីប្រគល់វិញ្ញាបនបត្រជូនដល់សិស្សជ័យលាភី កាលពីថ្ងៃទី៧ កក្កដា លោក ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា មានប្រសាសន៍ថា យុវសិស្សកម្ពុជាទទួលបានជោគជ័យក្នុងការប្រកួតកម្រិតអន្តរជាតិនេះ បង្ហាញថាកម្ពុជាមានធនធានមនុស្សប្រកបដោយសមត្ថភាព។ ជាមួយគ្នានោះ លោក ហង់ជួន ណារ៉ុន ក៏ជំរុញលើកទឹកចិត្តអ្នកសិក្សាឱ្យខិតខំរៀនពង្រីកចំណេះដឹងបន្តទៀត ដើម្បីឈានទៅសម្រេចនូវសមិទ្ធផលថ្មីៗ និងក្តីស្រមៃរបស់ខ្លួនកាន់ធំនាពេលអនាគត៕
