ឥណ្ឌូនេស៊ី៖ ស្ត្រីម្នាក់ត្រូវបានគេប្រទះឃើញស្លាប់ នៅក្នុងពោះរបស់ពស់ថ្លាន់មួយក្បាល ដែលមានប្រវែងជាង ១០ម៉ែត្រ បន្ទាប់ពីវាបានលេបនាងទាំងមូល នៅប្រទេសឥណ្ឌូនេស៊ី ក្នុងខេត្ត South Sulawesi កាលពីថ្ងៃទី៣ ខែកក្កដា។
បើតាមសាច់ញាតិ អ្នកស្រី Siriati មានអាយុ ៣៦ឆ្នាំបានបាត់ខ្លួន បន្ទាប់ពីនាងបានចេញពីផ្ទះ កាលពីព្រឹកថ្ងៃអង្គារ ដើម្បីទៅទិញថ្នាំឱ្យកូនរបស់នាងដែលឈឺ។ ក្រោយបាត់មិនឃើញត្រឡប់មកផ្ទះ សាច់ញាតិក៏មានការព្រួយបារម្ភយ៉ាងខ្លាំង បានផ្ដល់ដំណឹងដល់ប៉ូលីស ដើម្បីឲ្យជួយស្វែងរក។ ពេលកំពុងស្វែងរកនោះ ប្តីរបស់នាង លោក Adiansa ដែលមានអាយុ ៣០ ឆ្នាំបានប្រទះឃើញស្បែកជើង និងសម្លៀកបំពាក់របស់នាង នៅលើដីចម្ងាយប្រហែល ៥០០ ម៉ែត្រពី ផ្ទះរបស់ពួកគេ។
ក្រោយឃើញដូចច្នោះ ក្រុមប៉ូលីសក្នុងស្រុក ក៏បានស្វែងរករហូតប្រទះឃើញពស់ថ្លាន់មួយក្បាល ដែលមានប្រវែង ១០ម៉ែត្រដែលពោះវាធំសម្បើមវាលមិនរួច បន្ទាប់ពីប្រទះឃើញពស់ថ្លាន់នោះ ក្រុមមន្ត្រីប៉ូលីស មានការសង្ស័យហើយ ក៏បានហៅអ្នកភូមិឲ្យជួយវះពោះវាហើយក៏បានរកឃើញសពនាងនៅក្នុងពោះថ្លាន់៕
