ព្រះសីហនុ៖ ស្នងការដ្ឋាននគរបាលខេត្តព្រះសីហនុ កាលពីថ្ងៃទី២០ ឧសភា បានទទួលបណ្តឹងតាមរយៈ HOTLINE ពីករណី «ជនបរទេសប្រមូលផ្តុំគ្នាមិនព្រមចូលធ្វើការ» នៅចំណុចកាស៊ីណូ ជីន ប៉ី បួន នៅក្រុងព្រះសីហនុ។ បន្ទាប់ពីទទួលបានព័ត៌មាននេះ សមត្ថកិច្ច បានចុះទៅដល់ទីតាំង និង បានពិនិត្យឃើញជនបរទេសកំពុងផ្តុំគ្នានៅទីលានតារាងបាល់បោះ ក្នុងទីតាំងកាស៊ីណូចំនួន ៥៧នាក់ ដែលក្នុងនោះជនជាតិឥណ្ឌា ៥៥នាក់ និង ជនជាតិនេប៉ាល់ ០២នាក់។
របាយការណ៍ពីស្នងការខេត្តព្រះសីហនុបានឲ្យដឹងថា កាលពីថ្ងៃទី២០ ខែឧសភា ឆ្នាំ២០២៤ ស្នងការដ្ឋាននគរបាលខេត្តព្រះសីហនុ បានទទួលបណ្តឹងតាមរយៈ HOTLINE ពីករណី «ជនបរទេសប្រមូលផ្តុំគ្នាមិនព្រមចូលធ្វើការ» នៅចំណុចកាស៊ីណូ ជីន ប៉ី បួន ស្ថិតនៅក្រុមទី១៥ ភូមិ៤ សង្កាត់លេខ៤ ក្រុងព្រះសីហនុ ខេត្តព្រះសីហនុ ។
សមត្ថកិច្ចបានពិនិត្យឃើញជនបរទេសកំពុងផ្តុំគ្នានៅទីលានតារាងបាល់បោះក្នុងទីតាំងកាស៊ីណូចំនួន ៥៧នាក់។ នៅក្នុងនោះ ជនបរទេសមានលិខិតឆ្លងដែនជាប់ខ្លួន ចំនួន ៤៩នាក់ (ឥណ្ឌា ៤៧នាក់ និងនេប៉ាល់ ២នាក់) និងជនបរទេសគ្មានលិខិតឆ្លងដែនជាប់ខ្លួន ចំនួន ៨នាក់ ជាជនជាតិឥណ្ឌា។
ក្រោយពីត្រួតពិនិត្យ និងស្តាប់ការបំភ្លឺរបស់ជនបរទេសខាងលើ បានឱ្យដឹងថា ដោយសារមិនពេញចិត្តនឹងការងារ និងចង់ត្រឡប់ទៅប្រទេសកំណើតវិញ ទើបពួកគេនាំគ្នាប្រមូលផ្តុំមិនព្រមចូលធ្វើការ ។ ពាក់ព័ន្ធករណីខាងលើ កម្លាំងនគរបាលបានសម្រេចធ្វើការនាំខ្លួនជនបរទេសចំនួន ៥៧នាក់ មកកាន់ស្នងការដ្ឋាននគរបាលខេត្តព្រះសីហនុ ដើម្បីធ្វើការសាកសួរបន្ថែម ។
នៅថ្ងៃទី២១ ខែឧសភា ឆ្នាំ២០២៤ ដោយមានការឯកភាពគ្នា បានធ្វើការសម្របសម្រួលបញ្ជូនជនបរទេសទាំង ៥៧នាក់ ទៅនាយកដ្ឋានស៊ើបអង្កេត និងអនុវត្តនីតិវិធី នៃអគ្គនាយកដ្ឋានអន្តោប្រវេសន៍ (នៅរាជធានីភ្នំពេញ) ដើម្បីបន្តនីតិវិធី៕
