ភ្នំពេញ៖ សាស្រ្តាចារ្យនៃវិទ្យាល័យហាវ៉ៃ មួយរូប បានដឹកនាំនិស្សិតមួយក្រុមពីអាម៉េរិក មកកម្ពុជា ដើម្បីសិក្សាពីរបៀបធ្វើម្ហូបខ្មែរ ព្រមទាំងសិក្សាពីវប្បធម៌ រយៈពេល ៨ សប្តាហ៍។
យោងតាមការផ្សព្វផ្សាយក្នុងហ្វេសប៊ុករបស់ Chef Nak បានឱ្យដឹងថា សាស្រ្តាចារ្យបរទេសមួយរូបបានដឹកនាំសិស្សមួយក្រុមដែលសិក្សានៅសាកលវិទ្យាល័យហាវ៉ៃ ( Hawaii) មកកម្ពុជា ក្នុងគោលបំណងសិក្សា និងស្វែងយល់ពីតម្លៃនៃម្ហូបខ្មែរ តើត្រូវធ្វើដោយរបៀបណា និងត្រូវផ្សំគ្រឿងយ៉ាងដូចម្តេចខ្លះ។
សាស្រ្តាចារ្យរូបនេះ បានបន្តទៀតថា ការសិក្សាពីភាសាខ្មែរ ម្ហូបខ្មែរ និងវប្បធម៌ខ្មែរនេះនឹងមានរយៈពេល ៨ សប្តាហ៍ ។ នៅក្នុងវីដេអូនោះ ក៏មានជនជាតិអាម៉េរិកមួយរូបដែលមានឈ្មោះក្រៅថា រិទ្ធី បានបង្ហាញអារម្មណ៍សប្បាយរីករាយកំឡុងពេលសិក្សាពីការធ្វើសម្លនំបញ្ចុក ព្រមទាំងសិក្សាពីវប្បធម៌ខ្មែរ។
តាមរយៈវីដេអូខាងលើនេះ សាស្រ្តាចារ្យបរទេសក៏បានរៀបរាប់ថា ការធ្វើដំណើរមកសិក្សានៅប្រទេសខ្មែរនេះ ត្រូវបានទទួលការគាំទ្រពី Fulbright នៃសហរដ្ឋអាម៉េរិក៕
