ក្រសួងអប់រំប្រកាសជ្រើសរើស«យុវជន១៥រូប»ចូលរួមកម្មវិធីនាវាយុវជនអាស៊ីអាគ្នេយ៍និងជប៉ុន

ភ្នំពេញ៖ ក្រសួងអប់រំ ធ្វើការជ្រើសរើសប្រតិភូយុវជនចំនួន ១៥រូប ដើម្បីចូលរួមកម្មវិធីនាវាយុវជនអាស៊ីអាគ្នេយ៍ និងជប៉ុន លើកទី៤៨ "The Ship for Southeast Asian and Japanese Youth Program - SSEAYP” ដែលប្រព្រឹត្តទៅចាប់ពីថ្ងៃទី០៤ ខែវិច្ឆិកា ដល់ថ្ងៃទី១១ ខែធ្នូ ឆ្នាំ២០២៤ នៅប្រទេសជប៉ុន, វៀតណាម និងឥណ្ឌូនេស៊ី។

បើតាមការផ្សព្វផ្សាយរបស់ក្រសួងអប់រំបានឱ្យដឹងថា កម្មវិធីនាវាយុវជនអាស៊ីអាគ្នេយ៍ និងជប៉ុនលើកទី៤៨ នឹងប្រព្រឹត្តទៅរយៈពេល ៣៨ ថ្ងៃ ដែលនឹងធ្វើការចាប់ផ្តើមពីថ្ងៃ០៤ វិច្ឆិកា ដល់ ថ្ងៃទី១១ ខែធ្នូ ឆ្នាំ២០២៤។ កម្មវិធីនេះនឹងធ្វើដំណើរទៅកាន់ប្រទេសជប៉ុន វៀតណាម និងឥណ្ឌូនេស៊ី។ បច្ចុប្បន្ន ក្រសួងអប់រំកំពុងតែធ្វើការជ្រើសរើសប្រតិភូយុវជនចំនួន១៥រូប ដើម្បីចូលរួមកម្មវិធីនាវាយុវជននេះរហូតដល់ថ្ងៃទី២០ ឧសភា។

យុវជនដែលអាចដាក់ពាក្យចូលរួមកម្មវិធីនេះបានតម្រូវឱ្យមានអាយុ ១៨ ឆ្នាំ ទៅ ៣០ ឆ្នាំ ដែលអាចប្រើប្រាស់ភាសាអង់គ្លេសបានល្អ មានចំណាប់អារម្មណ៍ និងចំណេះដឹងជ្រៅជ្រះ ទាក់ទងនឹងអាស៊ាន និងប្រទេសជប៉ុន ព្រមទាំងមានសុខភាពផ្លូវកាយ និងផ្លូវចិត្តល្អ។ ហេតុនេះ យុវជនដែលមានចំណាប់អារម្មណ៍អាចធ្វើការដាក់ពាក្យតាមអនឡាញតាមរយៈតំណភ្ជាប់ https://forms.gle/MxpQ1apo7kCED3yw6 ឱ្យបានមុនថ្ងៃទី២០ ឧសភា ឆ្នាំ២០២៤ វេលាម៉ោង ៥រសៀល។

ជារៀងរាល់ឆ្នាំ កម្មវិធីនេះមានលើកយកនូវបញ្ហាផ្សេងៗមកពិភាក្សាក្នុងចំណោមយុវជន និងស្វែងរកដំណោះស្រាយ។ ហើយប្រធានបទដែលនឹងលើកយកមកពិភាក្សាក្នុងកម្មវិធិនាវាយុវជនឆ្នាំនេះមានដូចជា ៖

• អំណាចទន់ និងការទូតយុវជន

• កំណើនសេដ្ឋកិច្ច និងសហគមន៍ប្រកបដោយចីរភាព

• ការពង្រឹងអំណាចសកល និងការប្រែប្រួលអាកាសធាតុ

• ការកាត់បន្ថយហានិភ័យ គ្រោះមហន្តរាយ និងការស្តារឡើងវិញ

• សុខភាព និងសុខមាលភាព

• សង្គមឌីជីថល

គួរបញ្ជាក់ផងដែរថា កម្មវិធីនាវាយុវជនត្រូវបានប្រព្រឹត្តឡើងជាលើកទី៤៨ ក្នុងការផ្សារភ្ជាប់ទំនាក់ទំនងរវាងប្រទេសជប៉ុន និងតំបន់អាស៊ានដែលមានការចូលរួមពីយុវជនតំណាងប្រទេសនីមួយៗ៕