![](https://cdn.cc-times.com/kh.cc-times.com/media/47683/large/440745568_980468050309638_6705932878368548216_n.jpg?1714379732)
សៀមរាប៖ អាជ្ញាធរជាតិអប្សរា សហការជាមួយទីភ្នាក់ងារសហប្រតិបត្តិការអន្តរជាតិកូរ៉េ ( KOICA) តាមរយៈមូលនិធិបេតិកភណ្ឌវប្បធម៌កូរ៉េ (KCHF) គ្រោងបញ្ចាប់ការជួសជុលខឿនរបស់ព្រះលានជល់ដំរី នៅចុងឆ្នាំ២០២៤ខាងមុខ។ ការងារជួសជុលខឿនព្រះលានជល់ដំរីនេះ បែងចែកជាចំនួន២ទីតាំង រួមមានទីតាំងA ស្ថិតនៅផ្នែកខាងជើង ប្រវែង២០ម៉ែត្រ និងទីតាំងC នៅផ្នែកខាងត្បូងប្រវែង១៥ម៉ែត្រ បានចាប់ផ្តើមតាំងពីចុងឆ្នាំ២០២១។
![](https://cdn.cc-times.com/kh.cc-times.com/media/47684/large/440966220_980459930310450_8243603726628940425_n.jpg?1714379743)
អ្នកស្រី សៀង សុផានី អ្នកបុរាណវិទ្យា និងជាក្រុមការងារបច្ចេកទេសនាយកដ្ឋានអភិរក្សប្រាសាទ និងបុរាណវិទ្យា ប្រចាំការនៅការដ្ឋានជួសជុលព្រះលានជល់ដំរីទីតាំងA បានឱ្យដឹងថា ការងារដែលសម្រេចនៅទីតាំងA បានបញ្ចប់ការងារកំណាយស្រាវជ្រាវបែបបុរាណវិទ្យា និងជួសជុលកម្រាលថ្មបាយក្រៀមផ្នែកខាងលើដែលស្រុត ព្រមទាំងបានពង្រីកការជួសជុលកម្រាលនៅទិសខាងត្បូងប្រវែង ៣ម៉ែត្របន្ថែមទៀត ដើម្បីបញ្ចៀសការស្រុតហូរច្រោះដោយទឹកភ្លៀង និងជួសជុលពង្រឹងគ្រឹះ នឹងរៀបជញ្ជាំងថ្មភក់ផ្នែកខាងកើតនៃព្រះលានជល់ដំរីបានចំនួន ៥រួតផងដែរ។
![](https://cdn.cc-times.com/kh.cc-times.com/media/47685/large/440952954_980459976977112_1681546586821948133_n.jpg?1714379754)
ជាមួយគ្នានោះ ស្ថាបត្យករ និងជាក្រុមការងារបច្ចេកទេសនាយកដ្ឋានអភិរក្សប្រាសាទ និងបុរាណវិទ្យា នៃអាជ្ញាធរជាតិអប្សរា ប្រចាំការនៅការដ្ឋានទីតាំងC លោក ព្រំ ទិត្យឆពណ្ណរិទ្ធ ក៏បានឱ្យដឹងថា បច្ចុប្បន្ន ក្រុមការងារបានជួសជុលពង្រឹង និងរៀបជញ្ជាំងដែលទ្រេតមកខាងមុខ ដាក់ត្រឹមត្រូវតាមលំនាំដើមបាន៩០ភាគរយហើយ។ ចំណែកឯផ្នែកកម្រាលខាងលើ ក្រុមការងារកំពុងសិក្សារៀបចំប្រព័ន្ធរំដោះទឹកទៅតាមអនុសាសន៍របសក្រុមអ្នកជំនាញការអាយស៊ីស៊ី-អង្គរ។ ដូច្នេះការងារដែលនៅសេសសល់មានតែ ការរៀបចំប្រព័ន្ធរំដោះទឹក រៀបចំកម្រាលផ្នែកខាងលើឡើងវិញ និងបង្កាន់ដៃនាគប៉ុណ្ណោះ៕
![](https://cdn.cc-times.com/kh.cc-times.com/media/47686/large/440781005_980460336977076_7571630941417188059_n.jpg?1714379762)
![](https://cdn.cc-times.com/kh.cc-times.com/media/47687/large/440788930_980460196977090_7851625828474451215_n.jpg?1714379767)
![](https://cdn.cc-times.com/kh.cc-times.com/media/47688/large/440808984_980460003643776_4969886689106311070_n.jpg?1714379776)
![](https://cdn.cc-times.com/kh.cc-times.com/media/47689/large/440963178_980459903643786_4053189986553304_n.jpg?1714379784)
![](https://cdn.cc-times.com/kh.cc-times.com/media/47690/large/440970760_980460116977098_1750171696974463315_n.jpg?1714379789)
![](https://cdn.cc-times.com/kh.cc-times.com/media/47691/large/440974572_980459866977123_5903250612231350201_n.jpg?1714379796)