ភ្នំពេញ៖ បេក្ខជន ៨ វិទ្យាល័យ បានជាប់នៅក្នុងវគ្គជម្រុះជុំទី២ ក្នុងចំណោមបេក្ខជន ១៦វិទ្យាល័យ ដើម្បីបន្ដទៅកាន់វគ្គជម្រុះជុំទី៣ នៃកម្មវិធីជជែកដេញដោលយុវជនថ្នាក់ជាតិ ដែលនឹងធ្វើឡើងនៅថ្ងៃទី២ ខែមិថុនា ឆ្នាំ២០២៤ នាពេលខាងមុខនេះ។
គ្គជម្រុះជុំទី១នៃកម្មវិធីជជែកដេញដោលយុវជនថ្នាក់ជាតិ២០២៤ មានបេក្ខជនមកពី ៣២វិទ្យាល័យ ទូទាំង ២៥ រាជធានី-ខេត្ត នៃព្រះរាជាណាចក្រកម្ពុជា បានចូលរួមប្រកួតជជែកដេញដោល និងតស៊ូមតិទៅលើ ១៦ប្រធានបទ នៅក្នុងកម្មវិធីជជែកដេញដោលយុវជនថ្នាក់ជាតិ២០២៤ កាលពីថ្ងៃទី១៦-១៧ និងថ្ងៃទី២៣-២៤ ខែមីនា ឆ្នាំ២០២៤។
បន្ទាប់ពីឆ្លងការការប្រកួតប្រជែងយ៉ាងស្វិតស្វាញ បេក្ខជនមកពី ១៦ វិទ្យាល័យ បានជាប់បន្តទៅវគ្គជម្រុះជុំទី២ នៃកម្មវិធីជជែកដេញដោលយុវជនថ្នាក់ជាតិ២០២៤ ដែលបានធ្វើឡើងនៅថ្ងៃទី២៧-២៨ ខែមេសា ឆ្នាំ២០២៤។ នៅក្នុងការប្រកួតវគ្គជម្រុះជុំទី២ បានរកឃើញ បេក្ខជនមកពី ៨ វិទ្យាល័យ បានជាប់បន្តទៅវគ្គជម្រុះជុំទី៣ នៃកម្មវិធីជជែកដេញដោលយុវជនថ្នាក់ជាតិ២០២៤ ដែលនឹងប្រព្រឹត្តទៅនៅថ្ងៃទី២ ខែមិថុនា ឆ្នាំ២០២៤ ខាងមុខនេះ។
ជាមួយគ្នានោះ គណៈកម្មការរៀបចំកម្មវិធី លើកទឹកចិត្តដល់បេក្ខជនដែលមិនបានបន្តទៅវគ្គបន្ទាប់ មេត្តាប្រើប្រាស់ចំណេះដឹងដែលខ្លួនទទួលបានពីកម្មវិធីក្នុងការសិក្សារៀនសូត្រ និងត្រៀមខ្លួនរួចជាស្រេចក្នុងការចូលរួមប្រកួតប្រជែងនានា។ បេក្ខជនត្រូវចាំថានេះជាចំណុចចាប់ផ្ដើម មិនមែនជាចំណុចបញ្ចប់នៃការតស៊ូព្យាយាមរបស់ខ្លួនឡើយ៕
