ភ្នំពេញ៖ ក្រសួងអប់រំ យុវជន និងកីឡា បានចេញសេចក្តីជូនដំណឹង អំពីការរៀបចំការប្រកួតកីឡាឧត្តមសិក្សា និង មធ្យមសិក្សាបច្ចេកទេសថ្នាក់ជាតិ ចាប់ពីថ្ងៃទី ១៨-២៧ ខែឧសភា ឆ្នាំ២០២៤ ដោយបាន កំណត់កីឡាចំនួន ១៣ប្រភេទ នៅរាជធានីភ្នំពេញ។
បើយោងតាមក្រសួងអប់រំ យុវជន និងកីឡា បានជូនដំណឹង អំពីការប្រកួតកីឡាឧត្តមសិក្សា និង មធ្យមសិក្សាបច្ចេកទេសថ្នាក់ជាតិ ចាប់ពីថ្ងៃទី ១៨-២៧ ខែឧសភា ឆ្នាំ២០២៤ ដោយបាន កំណត់កីឡាចំនួន ១៣ប្រភេទ សម្រាប់ធ្វើការ ប្រកួតប្រជែង ដែលរួមមាន៖ កីឡាបាល់ទាត់, កីឡាបាល់ទះ, កីឡាបាល់បោះ, កីឡាអត្តពលកម្ម -កីឡាប៉េតង់, កីឡាហែលទឹក, កីឡាវាយកូនឃ្លីលើតុ, កីឡាវាយសី, កីឡាតេក្វាន់ដូ ITF, កីឡាតេក្វាន់ដូ WT,កីឡាការ៉ាតេ, កីឡាសីដក់, និងកីឡាគុនដាវ។
ជាមួយគ្នានេះ ក្រសួងអប់រំ ក៏បានបញ្ជាក់ថា ក្រសួងទទួលបន្ទុកលើការហូបចុក ស្នាក់នៅ និងដឹកជញ្ជូនកីឡាករ ក្នុងអំឡុងពេលការប្រកួត សម្រាប់គ្រូបង្វឹកគ្រូជំនួយ កីឡាករ កីឡាការិនី និងមន្ត្រីដែលមានក្នុងនិយាមបច្ចេកទេស ដែលបានកំណត់ក្នុងបទបញ្ញត្តិទូទៅ។ ចំណែកការហូបចុក ស្នាកនៅរបស់ប្រតិភូដឹកនាំ ការធ្វើដំណើរ ការហូបចុកពេលមកចូលរួមប្រកួត និងត្រលប់ទៅរាជធានី ខេត្តវិញ ជាបន្ទុកចំណាយរបស់អង្គភាពសាមី៕
