ភ្នំពេញ៖ អាហារូបករណ៍«សិល្បៈអមតៈអានចនផន» សម្រាប់សិក្សាអភិវឌ្ឍជំនាញសិល្បៈ និងជំនាញមិនមែនសិល្បៈ ចាប់បើកទទួលពាក្យស្នើសុំជាផ្លូវការចាប់ពីថ្ងៃប្រកាសនេះរហូតដល់ថ្ងៃទី ៣១ ខែ ឧសភា ឆ្នាំ ២០២៤។
បើតាមការប្រកាសជាសាធារណៈ បានឱ្យដឹងថា «អាហារូបករណ៍សិល្បៈអមតៈ អាន ចន ផន» ផ្ដល់ឱកាសឱ្យនិស្សិតសិល្បៈ សិល្បករ លោកគ្រូអ្នកគ្រូសិល្បៈ និងអ្នកធ្វើការងារក្នុងវិស័យសិល្បៈវប្បធម៌ យកទៅអភិវឌ្ឍសមត្ថភាព និងសក្ដានុពលរបស់ខ្លួន ព្រមទាំងពង្រីកចំណេះដឹងក្នុងវិស័យសិល្បៈវប្បធម៌ផងដែរ។ អាហារូបករណ៍នេះនឹងផ្តល់ជូនជ័យលាភីចំនួន១០នាក់ ដែលនឹងចាប់ផ្តើមពី ខែ តុលា ២០២៤ ដល់ ខែ កញ្ញា ២០២៥។
អាហារូបករណ៍នេះមានផ្តល់ជូនជាទឹកប្រាក់ចំនួន១៥០០ ដុល្លារដើម្បីធ្វើការសិក្សាជំនាញដែលពាក់ព័ន្ធនឹងសិល្បៈ ដើម្បីជួយគាំទ្រដល់អ្នកនៅក្នុងវិស័យសិល្បៈវប្បធម៌ដែលត្រូវការឱកាសនេះ អាចសិក្សា និងបញ្ចប់ការសិក្សាជំនាញសិល្បៈដោយបានជោគជ័យ អភិវឌ្ឍគុណតម្លៃផ្ទាល់ខ្លួនដែលមានការគិតទូលំទូលាយ និងបណ្តុះសក្តានុពលលើការដឹកនាំក្នុងវិស័យសិល្បៈវប្បធម៌។
សម្រាប់លក្ខខណ្ឌនៃអាហារូបករណ៍នេះមានដូចជា មានអាយុយ៉ាងតិច ១៨ ឆ្នាំ ដែលកំពុងតែរៀន ឬ ធ្វើការពាក់ព័ន្ធនឹងវិស័យសិល្បៈវប្បធម៌យ៉ាងតិច ៣ ឆ្នាំ ហើយមានគោលបំណង និងឆន្ទៈក្នុងការអភិវឌ្ឍជំនាញសិល្បៈ និងអាជីពក្នុងវិស័យសិល្បៈ ព្រមទាំងអាចមានពេលចូលរួមកម្មវិធីតាមការបរិច្ឆេទដែលបានកំណត់។
ដើម្បីអាចដាក់ពាក្យ សូមធ្វើការបំពេញព័ត៌មាន និងឆ្លើយសំណួរនៅក្នុងទម្រង់ពាក្យស្នើសុំ ដែលអាចទាញយកតាមរយៈតំណភ្ជាប់ https://www.cambodianlivingarts.org/kh/opportunities/arn-chorn-pond-living-arts-scholarship/ បន្ទាប់មកផ្ញើទៅកាន់អ៊ីមែល ឬ តេលេក្រាម ឬទៅដាក់ផ្ទាល់នៅទីតាំងអង្គការ សិល្បៈខ្មែរអមតៈ ។ ប្រសិនបើមានចម្ងល់បន្ថែមសូមទាក់ទងទៅកាន់៖ [email protected] ឬ តាមលេខទូរស័ព្ទនេះ៖ ០១០ ៩៤១ ២២៤។
គួរបញ្ជាក់ផងដែរថា កម្មវិធីអាហារូបករណ៍សិល្បៈអមតៈ អាន ចន ផន ត្រូវបានបង្កើតឡើងក្នុងឆ្នាំ ២០១០ ក្នុងគោលបំណងអភិវឌ្ឍទស្សនៈវិស័យសិល្បៈរបស់សិស្សនិស្សិត លើកកម្ពស់នៃការរួមបញ្ចូល ភាពច្នៃប្រតិដ្ឋ ព្រមទាំងកម្រិតវិជ្ជាជីវៈ និងសក្តានុពលរបស់និស្សិតក្នុងការក្លាយខ្លួនជាអ្នកដឹកនាំក្នុងវិស័យមួយនេះ៕
