កណ្តាល៖ ក្រុមយុវជន នៅក្នុងភូមិកោះប្រាក់ ឃុំភូមិធំ ស្រុកកៀនស្វាយ ដឹកនាំដោយយុវតី សៅ សុជា មានគ្នាប្រមាណជា៧ នាក់ ដោយទឹកចិត្តស្រឡាញ់វប្បធម៌ប្រពៃណីជាតិខ្មែរ បានចំណាយថវិកាផ្ទាល់ខ្លួនរៀបចំតុបតែង កែលម្អ ក្នុងភូមិរបស់ខ្លួន ហើយប្រមូលយុវជនជាច្រើនផ្សេងទៀតមកលេង ល្បែងប្រជាប្រិយខ្មែរ។សកម្មភាពនេះ គឺទទួលបានសាទរជាខ្លាំងពីសំណាក់អ្នកលេងបណ្តាញសង្គម។
ភូមិកោះប្រាក់ ជាកូនភូមិមួយដែលសម្បូរដោយធម្មជាតិ រុក្ខជាតិជាច្រើន ហើយជាពិសេសមាននូវយុវជនដែលស្រឡាញ់ វប្បធម៌ថែមទៀតផង។ យុវតី សៅ សុជា ជាអ្នកដឹកនាំដំបូងក្រុមយុវជន ភូមិកោះប្រាក់ ឃុំភូមិធំ ស្រុកកៀនស្វាយ ដើម្បីរៀបចំតុបតែង ក្នុងស្រុកភូមិរបស់ខ្លួន និង ជំរុញឱ្យក្មេងៗក្នុងភូមិចូលរួមលេខល្បែងប្រជាប្រិយខ្មែរ។
តាមរយៈបណ្តាញសង្គមផ្លូវការផ្ទាល់ខ្លួន យុវតី សៅ សុជា តំណាងឱ្យក្រុងយុវជនផ្សេងទៀត បានអះអាងថា ក្រុមយុវជនបានរៀបចំក្នុងគោលបំណង ជំរុញឱ្យយុវជនជំនាន់ក្រោយចូលរួមលេងល្បែងប្រជាប្រិយខ្មែរដែលជាមរតដូចតា។ប្អូនស្រីថា បើយើងមិននាំប្អូនៗជំនាន់ក្រោយលេខទេ បារម្ភខ្លាចបាត់បង់របស់ដូចតាយើង ព្រោះតាមឯកសារ ល្បែងប្រជាប្រិយខ្មែរ តាមលេងតាំងពីជំនាន់មុនៗមកម្លេះ។
ល្បែងប្រជាប្រិយខ្មែរ គឺជាល្បែងដែលប្រជាពលរដ្ឋខ្មែរនិយមលេងកម្សាន្ត ដើម្បីអបអរសាទរពិធីបុណ្យចូលឆ្នាំខ្មែរ។ សម័យមុន ការលេងល្បែងប្រជាប្រិយចាប់ផ្ដើមតាំងពីមួយឬពីរខែមុនពិធីបុណ្យចូលឆ្នាំឈានចូលមកដល់។ ប៉ុន្តែរហូតមកទល់ពេលនេះ ពលរដ្ឋខ្មែរពិសេសយុវជន លែងសូវនិយមលេងល្បែងប្រជាប្រិយដូចមុនទៀតហើយ។
ថ្មីៗនេះរាជរដ្ឋាភិបាលកម្ពុជា បានជំរុញឱ្យប្រជាពលរដ្ឋរួមគ្នា ល្បែងប្រជាប្រិយខ្មែរ ដើម្បីចូលរួមថែរក្សាវប្បធម៌ ប្រពៃណីជាតិ។សម្រាប់រាជរដ្ឋាភិបាល ល្បែងប្រជាប្រិយខ្មែរ មានរហូតដល់ទៅជាង២០ទម្រង់ មិនត្រឹមតែមានប្រយោជន៍ពង្រឹងសាមគ្គីភាព ធ្វើឲ្យសប្បាយ មានសុខភាពកម្លាំងកាយនិងស្មារតីរឹងមាំទេ វាក៏ជាអត្តសញ្ញាណមួយរបស់ខ្មែរ ដែលបន្សល់ទុកតាំងពីបូរាណកាលមក៕
