វៀតណាម៖ ប្រទេសវៀតណាមភាគខាងត្បូង កំពុងទទួលរងរលកកំដៅដ៏ក្តៅបំផុតដែលពុំធ្លាប់កើតមានឡើង ដោយសារលំនាំអាកាសធាតុខុសប្រក្រតី បានជំរុញឱ្យសីតុណ្ហភាពកើនឡើងដល់ ៣៨.៥ អង្សាសេ។ អាកាសធាតុប្រែប្រួលខ្លាំងបែបនេះបានធ្វើឲ្យអ្នកជំនាញវៀតណាមសម្តែងការព្រួយបារម្ភជាខ្លាំងដោយសាររលកកំដៅក្តៅខ្លាំងអាចនិងប៉ះពាល់ដល់សុខភាព និងការប្រកបរបររបស់ប្រជាពលរដ្ឋវៀតណាម។
លោក Le Dinh Quyet ប្រធានមជ្ឈមណ្ឌលជលសាស្ត្រ និងឧតុនិយមប្រចាំតំបន់ភាគខាងត្បូង បានឲ្យដឹងថា អាកាសធាតុក្តៅបានអូសបន្លាយ ចាប់ពីខែកុម្ភៈកន្លងទៅ ដោយសារតែឥទ្ធិពលនៃ El Niñoដោយអាកាសធាតុក្តៅ និងមានពន្លឺថ្ងៃនៅឆ្នាំនេះ នឹងខ្ពស់ជាងឆ្នាំមុនៗ ដោយសារមានការបម្រែអាកាសធាតុជាខ្លាំង។ ហើយការបម្រែបម្រួលក៏បានបង្កភាពរាំងស្ងួត ដែលបណ្តាលឲ្យទឹកតិចតួចហូរទៅកាន់ទន្លេមេគង្គ និងទឹកប្រៃ ប៉ះពាល់ដល់ការរស់នៅរបស់មនុស្សរាប់លាននាក់។
វិទ្យាស្ថានវិទ្យាសាស្ត្រជលសាស្ត្រ និងឧតុនិយម និងបម្រែបម្រួលអាកាសធាតុ បានឱ្យដឹងថា ប្រទេសវៀតណាមអាចនឹងសង្កេតឃើញសីតុណ្ហភាពខ្ពស់បំបែកកំណត់ត្រាក្នុងរយៈពេល ៣-៤ ខែខាងមុខ ជាមួយនឹងភ្លៀងធ្លាក់ទាបជាងឆ្នាំមុនៗ ជាពិសេសនៅភាគខាងត្បូង៕
