ក្រសួងហាមឃាត់ការចែកចាយផលិតផលបំប៉នសុខភាព CUR-D-HERB គ្មានលេខបញ្ជិកា

ភ្នំពេញ៖ ក្រសួងសុខាភិបាល នាថ្ងៃទី ១១ មីនា បានជូនដំណឹងដល់ប្រជាពលរដ្ឋឲ្យមានការប្រុងប្រយ័ត្នចំពោះផលិតផលបំប៉នសុខភាពឈ្មោះ CUR-D-HERB ដែលគ្មានលេខបញ្ជិកាពីក្រសួងសុខាភិបាល និងកំពុងធ្វើចរាចរណ៍លើទីផ្សារ នៅប្រទេសកម្ពុជា។

ក្រសួងសុខាភិបាល បានជូនដំណឹងដល់ប្រជាពលរដ្ឋទាំងអស់មិនត្រូវទិញ និងប្រើប្រាស់ផលិតផលបំប៉នសុខភាពដែលគ្មានលេខបញ្ជិកាខាងលើ ជាបន្តទៀត ព្រោះផលិតផលបំប៉នសុខភាពនេះមិនអាចធានាបាននូវ គុណភាព សុវត្តិភាព និងប្រសិទ្ធភាពបានឡើយ ហើយវាអាចជាឳកាសក្លែងក្លាយ បណ្ដាលឲ្យប៉ះពាល់ដល់សុខភាព ឬមានគ្រោះថ្នាក់ដល់អាយុជីវិតរបស់អ្នកប្រើប្រាស់ទៀតផង។

បន្ថែមពីនេះ ក្រសួងសុខាភិបាល តម្រូវឲ្យបុគ្គលដែលចែកចាយ ឬលក់ផលិតផលបំប៉នសុខភាពគ្មានបញ្ជិកាខាងលើ រួមទាំងជនពាក់ព័ន្ធដទែទៀតត្រូវបញ្ឈប់ការនាំចូល ចែកចាយ ឬលក់ផលិតផលបំប៉នសុខភាពខាងលើនេះជាបន្ទាន់។ ក្រសួងសុខាភិបាល នឹងមានវិធាការតឹងរឹុងទៅតាមផ្លូវច្បាប់ចំពោះជនណាដែលចែកចាយ ឬលក់ផលិតផលបំប៉នសុខភាពគ្មានលេខបញ្ជិកាខាងលើ និងជនពាក់ព័ន្ធដទៃទៀតទៅតាមច្បាប់ស្ដីពីវិសោធនកម្មច្បាប់ស្ដីពីការគ្រប់គ្រងឳសថជាធរមានផងដែរ៕