ភ្នំពេញ៖ ក្រុមហ៊ុនអាកាសចរណ៍ធំបំផុតរបស់ឥណ្ឌាមួយឈ្មោះ IndiGo នឹងភ្ជាប់ជើងហោះហើរត្រង់មកកាន់ទីក្រុងសៀមរាបចំនួន ២ ជើងក្នុងមួយថ្ងៃ ដោយមួយជើងភ្ជាប់ពីទីក្រុងញូវដេលី និង មួយជើងទៀតពីទីក្រុង Bangalore ដែលនឹងចាប់ផ្តើមនៅខែមិថុនា ខាងមុខនេះ ។
បើតាមអាកាសចរណ៍ស៊ីវិល កម្ពុជាត្រៀមស្វាគមន៍ភាគីឥណ្ឌា និងរងចាំថាតើខាងភាគីឥណ្ឌាសម្រេចចិត្តមកពេលណា។ នៅពេលឥណ្ឌាមានតារាងពេលវេលាហោះហើរជាក់លាក់ ទើបគេអាចស្នើសុំលិខិតអនុញ្ញារចុះចតបាន។
ជាមួយគ្នានោះ ក្រុមហ៊ុន Cambodia Angkor Air ក៏ត្រៀមនឹងភ្ជាប់ជើងហោះហើរទៅឥណ្ឌានៅក្នុងខែមិថុនា នេះដែរ ប៉ុន្ដែមិនទាន់កំណត់ពេលវលាជាក់លាក់នៅឡើយទេ ដោយសារកិច្ចការងារនេះ ត្រូវរៀបចំយន្ដហោះ អ្នកគ្រប់គ្រង អ្នកប្រតិបត្តិការនៅប្រទេសឥណ្ឌា រួមទាំងពេលវេលាហោះហើរជាដើម ដែលកិច្ចការងារនេះត្រូវចំណាយពេលវេលាច្រើន។
សូមជម្រាបថា IndiGo ក្រុមហ៊ុនអាកាសចរណ៍ធំបំផុតរបស់ប្រទេសឥណ្ឌា។ ក្រុមហ៊ុនមួយនេះមានយន្តហោះចំនួន ៣៥៣ គ្រឿង និង គោលដៅហោះហើរចំនួន ១១៩ គោលដៅ ជុំវិញពិភពលោក៕
